【独家】网上平台分享亲子食谱 陈倩扬同仔女下厨增感情

陈倩扬出名煮得，最近获网上烹饪平台邀请主持《Towngas Cooking煤气教煑》分享及示范亲子食谱。虽然倩扬为节目要准备三款菜式及一个甜品，但她直言零难度，因为本身有两仔一女的她，已经训练有素，加上疫情关系近期一日三餐都要亲自准备，一定要学识简单又多变化的菜式，才可以应付。不过她亦享受这段日子跟小朋友一齐下厨，增进不少感情。采访：杜淑霞 场地：煤气烹饪中心

倩扬获邀主持时，完全不担心要分享的食谱，「我真系觉得零难度，我一分钟就想好啦！因为呢个系我每日嘅工作，虽然有家佣姐姐帮手，但系我会谂好晒，所以脑里面随时都想到食谱出嚟，对我真系好简单。」她又解释当中窍门，「譬如日式咖喱，里面可以配唔同嘅肉或者蔬菜，配搭唔同成个感觉都有好大分别，少少变化已经系另一个餸。」

倩扬坦承疫情期间，三餐都留在家食确实压力不少，「因为哥哥（9岁长子）本来系返全日，细佬（5岁次子）就返半日，𠵱家三餐都喺屋企食，所以真系要谂多啲变化去应付。」不过，她有秘诀令小朋友食得更开心，「可以嘅话我会同佢哋一齐整，佢哋有份参与会特别开胃，就算妹妹𠵱家得两岁咁细，我都会畀佢帮手做啲简单嘢，虽然有啲家长担心整污糟啲地方，但地方可以再执返，同埋呢个系好好嘅亲子机会，我会教佢哋认识吓食材同煮嘢食过程，不知玩得几开心，一晚时间好快过。」




疫情下倩扬要一带三，虽然有家佣姐姐帮手，但她仍要主持港台节目《精灵一点》，所以分配时间方面要做得好，「好彩三个小朋友都算几乖，特别系大仔就算唔使返学校，只系网上上堂，佢都会自己写晒时间表。不过最搞笑，呢段日子二仔黐住大仔感情更加好，两个乜都一齐，就连去小便都要约埋去，真系好可爱，所以呢段日子虽然有辛苦地方，但系一家人感情仲好。」