【独家】每周享受几粒钟男人的浪漫 森美张继聪对老婆一条心

啱啱签咗古天乐公司嘅张继聪，事隔多年再出新歌《David Harleyson》，仲搵埋一班古董电单车迷如森美等人友情客串，一齐帮手拍MV，寓工作于娱乐。森美同张继聪志趣相投，亦系顾家好男人，森美笑言：「驾驶电单车要更加集中精神，训练到个人有少少冥想状态，咁就唔会乱咁谂埋啲冇谓嘢！」睇嚟森美旧拍档细So要学吓揸电单车喇！采访：方骞平 摄影：张咏森

日前森美及张继聪，驾驶深爱嘅Harley Davidson古董电单车享受男人的浪漫，一班车友几乎每个周日早上都有聚会，饮完茶兜完风，中午12点前就要赶返屋企交人。张继聪好Enjoy呢几个钟头，因为系属于中佬嘅自由时间：「一班人聚埋游车河系一种减压方式，而且男人去到某个阶段要有个嗜好，唔系食就瞓，个人好易走样。」森美点头同意，他们更影响到一班车迷变得愈嚟愈健康，大家都想有fit爆身形，可以着住靓衫揸住部车影靓相。

电单车「毒」性好强
张继聪爆森美有4部电单车，其中一部系用嚟买餸嘅「绵羊仔」，最离谱仲有部「驳脚车」，开去揸其他车，阿聪笑说：「嗱！4部就太离谱喇，我只得3架，而其中一架绝版PS-520系老婆谢安琪送我嘅生日礼物。因为电单车唔贵又悭地方，毒性真系好大。」除咗爱电单车，两人坦言对老婆一条心，阿聪说：「我老婆咁索，唔使谂出轨，我追我老婆都未追得掂呀！」森美笑说：「唔系个个人都好似我哋咁好运，不过，揸电单车都训练到集中精神，唔会乱咁谂埋啲冇谓嘢！其实写一部以电单车为题材嘅剧集都唔错，由开车讲人生，疫情下更贴切，唔少人驾车做送外卖。」