处男执导《孤独病》MV 姜涛越级挑战「一take过」拍摄

参加第一季ViuTV真人骚《全民造星》夺冠爆红的「姜B」姜涛，第5首个人单曲《孤独病》今日正式派台，而MV就听日见街。由于姜涛正身处台湾拍剧，暂时未能回港宣传新歌。不过唔紧要，虽然姜B人在台湾，但日日都可以喺香港见到姜涛个名，正所谓「姜涛不红，天理不容」。讲返MV，接job接唔停嘅姜B今次仲跨界别首次做埋MV导演，自导自演仲未算劲，佢更挑战高难度「一shot落」拍摄，「姜糖」们是咪睇字已经想大叫?

《孤独病》由林奕匡作曲、陈咏谦填词，讲述一个人孤苦无依的内心世界。歌曲以孤独为主题，而姜涛脑海一直有个画面与歌曲的主题匹配，他说：「好耐以前脑海就有一个画面，有一个spotlight打落嚟照住我一个，好反映到我内心嘅画面，但一直揾唔到合适嘅歌曲呈现出嚟，今次遇上《孤独病》，系一个好好嘅机会去用呢个idea，所以我就同花姐讲，可唔可以畀我参与拍摄MV嘅过程。」然后姜涛就顺理成章成为《孤独病》MV的导演。

早前在拍摄《蒙著嘴说爱你》MV时，当时的导演袁剑伟已想过为姜涛拍摄「一take过」的MV，但最后种种原因改变拍摄方法。今次姜涛终于得偿所愿，并首度担任MV导演，被问到这次MV拍摄最好玩的地方是甚么？姜涛笑言：「最好玩系可以坐喺导演位掌控成个MV，呈现喺你心目中嗰个样，可能开头唔似你想要嘅嘢，但系慢慢就成形，呢个系最过瘾嘅地方。」讲到最难忘的事情，姜涛表示是与工作人员之间的沟通，他说：「好多嘢唔符合你嘅画面，你要慢慢同大家沟通，先可以做到你心目中想要嘅画面，呢样嘢睇落去好似好容易，但其实任何一支MV或影片，你哋睇到1秒嘅shot，都要好多工作人员配合先可以完成，加上今次系1 shot过，更加需要大家配合，所以都NG咗好多次。」





对于自己首次执导的表现，姜涛坦言未做到最好，他说：「我已经尽咗力，拍咗我心目中想要嘅嘢，当然理想同现实有一定嘅差距，但自己已经满意，希望可以将成品分享畀大家。因为要见得人，系要过一个好高嘅关卡，所以过到自己，即使成品未系100分，都希望大家睇到都会有『wow!』嘅感觉。」姜涛明言，有机会的话，希望能再次执导，拍一首跳唱歌的MV。