【独家】《地产仔》与肥肠为女死为女亡 Stanley难忘畀姐姐疯狂摸身

2020-07-22 02:35

MIRROR成员Stanley（邱士缙）和肥肠（徐浩昌）最近在ViuTV新剧《地产仔》首次合作，饰演地产经纪新丁「阿鹿」和「肥龟」。剧中两人都为女死为女亡，Stanley更有机会发挥所长以性感热舞吸引女人买楼，其中令他最难忘是畀大班姐姐疯狂摸身。由于台前幕后太愉快，两人好想原班人马再合作，不论拍电影版定是做综艺，总之一齐合作就满足。采访：杜淑霞服装：Sense(肥肠)场地：Daisy Bloom

肥肠和Stanley在《地产仔》中饰演地产代理「和联兴地产」同事兼好兄弟，两人由于未合作过都担心唔够熟络会影响演出，所以第一日开工肥肠主动同Stanley倾偈，不过好快就熟络，Stanley说：「嗰日我哋都系倾剧本啲嘢，佢仲提我因为系喜剧，有时可以唔使太正经。」

当自己是「鸭王」

剧中两人为抢客可谓出尽浑身解数，Stanley更要经常施展美男计疯狂跳热舞冧客，他笑言当正自己是「鸭王」，讲到最难忘戏份，肯定跳舞冧大妈时被周身摸，「有幕大妈好似丧尸咁涌埋嚟喺咁摸我，摸咗好耐导演应该嗌cut，但导演都系冇嗌，最终系副导演嗌cut，导演话对讲机坏咗喎！（肥：导演有前科，试过无数次唔嗌cut等我哋继续演！）嗰次真系摸到妆都甩晒，啲演员姐姐入晒戏，仲好多戴晒私伙真珠宝嚟演，导演话我可以开拓埋妈妈级巿场。」

Stanley和肥肠坦言合作太愉快，完成拍摄后好唔舍得，Stanley煞科时更加眼湿湿，「因为我未试过演一个角色咁长时间，煞科时都有揽住大家，最感激导演呢个伯乐。」原来台前幕后早已提过原班人马添食，连电影版都谂埋，肥肠说：「我哋真系有倾过，但导演话再拍第二季未必有可能，或者电影版，甚至开过套『地盘仔』，总之大家一齐拍咩都得，做个综艺都可以㗎！」