陪「前世情人」食鱼蛋粉张兆辉望住个女甜到入心

2020-08-19 11:30

张兆辉出名系「24孝父亲」同埋「暖男老公」，上月「前世情人」张卓姿（Twiggy）16岁生日，辉哥着返套西装，同屋企人叹高级意大利菜庆祝，锡到个女燶。虽然最近辉哥忙拍TVB新剧《飞虎之壮志英雄》，但听到阿囡想食鱼蛋粉，即车佢去筲箕湾东大街食著名鱼蛋粉，呢个爸爸真系冇得顶。

噚晚辉哥喺社交网站上载图片，留言：「已经二个星期冇外出了，个女话好想食碗鱼蛋粉，世（势）估唔到咁样食鱼蛋粉、苦中作乐、好笑也好伤感、要相信疫情很快过，齐心就是力量，明天会更好。」网民都羡慕咁话：「做你个女真幸福！」限聚令下张兆辉同朋友一齐坐，就算张兆辉同囡囡分枱坐，但两父女一条心，眼见个女食完鱼蛋粉，又追加西多士及饮朱古力奶咁好胃口，真系心到甜埋。辉哥亦好守规矩，食完嘢即戴返个口罩先继续同朋友吹水，虽然外出用膳，但防疫意识好高。

16岁张卓姿亭亭玉立，好有少女味，样子带点锺嘉欣同李嘉欣混合体，系索爆星二代。就算食多咗，张卓姿都唔怕会肥，因为她经常跟辉哥行山同跑步，同嗲哋一样Keep得好fit。