【独家】赞黎耀祥有晒攻略抢钱 农夫笑言喺Do姐面前冇廉耻

组合农夫C君及陆永自从四年前同Do姐(郑裕玲)主持《Do姐有问题》后，几乎年年会再做一次，做到今次第4辑更有默契，喺节目中C君试过心直口快应Do姐：「咪谂紧罗！」即被Do姐骂：「你喝我呀？」互动得相当搞笑。被问到可有尴尬时？C君死撑说：「佢话我唔似人、乞儿咁都唔尴尬啦，喺佢面前系冇廉耻㗎！」采访：方骞平

农夫承认同Do姐合作得耐经已捉到节奏，明白大家做啲乜，陆永说：「今辑节目最有趣系睇返好多出世前嘅经典剧同昔日台庆片段，原来之前巨星刘青云、周星驰系咁。」C君：「嘉宾愈年轻愈有趣，好似江嘉敏、刘颖镟，喺外国返嚟嘅陈豪，完全唔识答，会乱咁答，但好好笑，视帝黎耀祥就最劲，佢睇晒每一集，所以好识玩，凭经验、智慧、知识上嚟攞你啲钱咁，有晒攻略，唔系单靠运气。」

限聚令后开音乐会
两人愈讲愈兴奋，更出埋鬼主意，好想喺最后一集由我哋做主持，Do姐变嘉宾玩游戏。C君谂起都觉得好笑：「到时我哋有得喝佢话『快鬼啲答啦，谂几耐呀！』我哋有提出过，佢好快拒绝，话谂吓先。」陆永话：「佢成日挑剔嘉宾，你估做嘉宾咁易呀？佢近年未必太知娱乐圈嘅嘢，可以考吓佢，TVB最高同最矮艺人同事系边个？边个Show钱最多。」另外，今年系农夫20周年，两年前农夫话过20周年时做10首新歌，加10首旧歌remix，两人真系做得到：「希望限聚令后，可以喺今年内做到一个新歌发布音乐会，就算非乐迷入场都会变成乐迷。」