【独家】食人夫疑云后冇再联络姚子羚 蔡宛珊拒参加富二代船P

前夫Raymond曾经同姚子羚拍拖惹嚟后者食人夫疑云，拥32D、24、34火辣身材的蔡宛珊（Sarika）不时出海，更在社交网大晒三点式泳衣照，网民当然赞Good。虽然同Raymond分紧居，但Sarika不愁冇市场，她更自爆有好多人邀她去船P，但她一概Say No：「我纯粹出海做运动，唔系钓金龟！」采访：方骞平 摄影、谭壹致

蔡宛珊每周勤做4次运动，亦会留意饮食：「为咗夏天要出海骚吓啲泳衣，我断食16小时嚟Keep Fit，每晚八点收工后先开始食嘢，主持ViuTV饮食节目《今晚趁热食》时，同事话我升咗仙咁，冇计啦，要有取舍，其实我好为食，每周会打两次边炉，嚟紧好多生日饭，留返限额食锺意嘅嘢，唯有平日乖啲忍吓口。」

只去合家欢船P
Sarika好锺意出海，曾疯狂地每周出海两次：「晒到一身健康肤色，个个以为我系游泳健将，其实我唔识游水，只系唔惊死，就算揽住条浮条都敢跳落海，着住救生衣就玩滑水。」提到冯盈盈参加船P被指钓金龟，而船P亦被标签为结识公子哥儿嘅踏板， Sarika即Say No：「我只会参加合家欢嘅船P，来来去去都系同有家室嘅契哥及相熟朋友出海，全部都一家大细出发。」Sarika强调唔会上唔识嘅人嘅游艇，「我知有啲人好锺意个个都叫吓，叫到一大班人一齐玩，我就好避忌呢啲，始终唔知咩人，又唔知点玩，有好多时叫你饮酒。」Sarika重申锺意出海系因为想去游水、滑水及晒太阳，「𠵱家我只会约埋三五知己，直接喺深湾码头上滑水船去海中心轮流滑水，滑完就走，连游艇都唔使上。」

失婚冇留阴影
问到拒绝参与识朋友活动会否失去好多黄金机会？Sarika说：「我冇咁嘅福份识到公子哥儿，𠵱家又唔系刻意唔拍拖，分居冇留低阴影，只系暂时未遇到啱，我永远都相信爱情，亦好清楚自己想要啲乜，唔会乱咁试，择偶条件系要孝顺父母，专一同锡我，最紧要系锺意做运动。」蔡宛珊坦言同前夫Raymond好少联络，但大时大节都会互相问候吓，但冇关心佢系咪同姚子羚复合：「最重要系佢开心同健康，私人嘢留返空间畀佢。事件过后我都冇同姚子羚联络，我好忙，好少睇电视，冇睇过佢啲戏，有时间都睇返系自己个台嘅戏啦！」考获健身牌的Sarika还会每周教朋友做街头健身，有指「情敌」姚子羚过瘦，问她会否帮子羚增肥？蔡宛珊即婉拒：「我知佢食素，可能佢喺饮食方面要改善，OK㗎啦！佢都keep得好好，唔使我教佢啦！」