【头条独家】疫情百态 张兆辉晚晚同老婆撑枱脚 姚子羚呻停Job又冇仔埋身
2020-02-13 21:00 
今日系情人节，于TVB剧集《黄金有罪》中饰演情侣嘅张兆辉及姚子羚约埋去贝沙湾一间酒店共晋法式情人节下午茶餐，两人挽手漫步草地，Sweet到爆！自爆专情但唔浪漫，近年才懂送花冧妻嘅辉哥笑说：「剧入面我为咗要实践对前度杨卓娜嘅承诺，所以牺牲咗情人知己，我对晶晶(姚子羚)唔住，唯有补返数啦！」经历过爱情大风浪的子羚大赞同辉哥一齐好好feel，还会以辉哥同辉嫂做蓝本，只求一段简单快乐但细水长流式嘅爱情，只可惜还未遇到！
采访：方骞平 摄影：谭壹致 发型：Kel Fung@HH hair.nail(张兆辉) 化妆：雷淑贤（大哥贤）发型：Taylor Wan @ Hair Corner(姚子羚) 化妆：Henry Li服装：[email protected] 饰物：Dearbell2ling 场地：Prompt Bistro@数码港艾美酒店4楼
张兆辉、姚子羚、萧正楠及洪永城主演的TVB剧集《黄金有罪》今晚大结局，剧情高潮迭起，大家都关注张兆辉饰演，坏事做尽的「荣木桐」收场。而辉哥跟姚子羚就擦出唔少火花，尤其后者让爱，爆喊主动提出分手一幕，两人演技获赞，子羚说：「辉嫂话分手嗰场戏睇咗40几次，呢场戏我都好锺意，好多朋友话睇到心都塞，有爱不能爱嘅痛，其实晶晶冇怪过Gordon，佢知道Gordon一直等紧未婚妻返嚟，而且见对方坐轮椅，男人在情在义，应该要照顾佢。」辉哥就话演呢场分手戏，其实喺男人视觉都系心痛，内疚，无奈嘅：「如果现实生活中有呢啲情节，哈！我谂要开三人会议嚟解决，我作为男人唔想享齐人之福，因为有一个女人都要做好多嘢，两个咪更烦。更何况我咁木独，冇钱又冇型，唔会有狂蜂浪蝶埋身。」对此，子羚大笑：「系呀！我都系因为《黄金有罪》先埋身。」
最喜欢月亮前Kiss
除咗分手戏，辉哥对浪漫共舞那场咀戏都好锺意，「最深刻同子羚喺街上共舞，喺月亮前Kiss，画面好浪漫好靓，好有mood，应该系近年最喜欢的爱情场口。」剧内，姚子羚虽然深爱辉哥，但都拣咗钱进(萧正楠)，剧外，39岁子羚经历过爱情大风浪，择偶心态有所改变：「因为荣木桐背景太复杂，爱得好辛苦，付出好多，相反钱进人生简单。人大咗想要细水长流嘅嘢，虽然系平淡，但无风无浪系福份，系一辈子想要嘅嘢，两公婆你笑吓我，我笑吓你就一世，好似辉哥、辉嫂一样，我见佢哋好有默契。」
大赞子羚系好女仔
问子羚现实生活中有冇比较简单嘅男仔出现？她说，「希望有，有就即杀！」再问有冇人追？她即说，「𠵱家非常时期大家留守屋企少咗社交，工作都受阻延，何况系感情？我连屋企人都少见，非常时期只系想快啲搵钱，大家尽快重回正轨，因为少咗好多商演。」辉哥大赞子羚系好女仔，可养精蓄锐，相信好女仔一定会遇好男人的。
至于喺疫情下，辉哥可会少咗同辉嫂Sweet？子羚抢著说：「其实食饭都会传染病毒喎，都唔使讲到有冇亲密接触啦！」辉哥形容两公婆日日都系情人节：「𠵱家得返我哋两个撑枱脚食饭，晚晚佢都坐我对面。」
最新回应