【头条独家】首合作演乞人憎自私精 陈奂仁Cool又恶吓亲卫诗雅

卫诗雅和陈奂仁（Hanjin）最近在ViuTV新剧《叹息桥》合作，剧中两人演拍拖多年的情侣，而两人一个冇主见一个就自私，特别是Hanjin演的「Ken」劲乞人憎，搞到他拍摄时好憎自己，所以平日笑眯眯的他，首日跟诗雅开工竟然变得好Cool又恶吓亲对方，事后Hanjin都觉得太投入角色冇睬诗雅唔好意思。撰文：杜淑霞 摄影：李维隆 发型：Wil@Salon de Lotus（诗雅） 化妆：Miko Wong@Cyrus Lee Team（诗雅） 服装：THREE FLOOR @ harvey Nichols（诗雅） 场地：MioXpace

诗雅今次演的「Joyce」同自己一样都是无乜主见的人，「佢事业爱情一样唔知自己想要啲咩，其实同我好似，除咗事业方面，工作上我系好有主见肯定自己想点，但其他嘢都系三分钟热度。」至于Hanjin就觉得同角色刚刚相反，甚至拍摄期间会憎自己，「我第一次演个自己咁唔锺意嘅角色，好彩我啲对手好帮到我，一路都好憎我，连啲工作人员都好入戏，食食吓饭都会话衰人嚟嘅你，连Paul哥（秦沛演诗雅爸爸）倾倾吓偈，都会话你正衰人嚟，成日虾我个女，唔同你倾偈。但系咁样好无奈，可唔可以埋位前唔好提我系衰人，畀我enjoy埋块鸡扒先。」

正因为Hanjin都憎埋自己，所以开工自然心情唔多靓，搞到诗雅第一日开工就吓亲，「第一日见佢觉得佢好cool好恶，可能系拍大家嘅第一场，因为嗰场戏系嗌交，佢培养紧情绪，佢好似好严肃喎呢个演员，我就唔敢搞住佢，所以只系打咗个招呼，自我介绍一下就行开。（陈：对唔住吓亲你）唔系，但之后拍落发现佢唔系cool嘅。」



讲到首做监制的林保怡，两人都大赞他照顾周到，老友Hanjin更大爆他的投入程度，「我同佢拍过两套戏，佢埋位之前好relax，好舒服嘅，一cut机呢仲未换衫，佢就话今晚我就安排咗大家去边度食饭，但系做监制，佢乜都要照顾住，真系好似只鹰咁，所以我收工都唔敢约佢。」