【英皇天下一合作】卫诗雅愿减片酬 陈家乐望多拍喜剧令人开心

对于英皇电影与天下一电影制作有限公司宣布携手合作，双方将于两年内合作制作及发行共十部香港电影，英皇旗下艺人卫诗雅、周家怡、李靖筠、杨天宇、陈家乐和汤怡均叫好。

卫诗雅：「好开心有呢个，因为我觉得两间公司合作首先会有唔一样嘅火花，二嚟就系如果开十套咁多，我觉得无论对演员或者电影工作人员都系一个好好嘅消息，因为起码有工开。确实喺呢几个月，好多电影都停晒，大家都好担忧，所以好支持呢个计划。当然如果减片酬可以帮到，绝对系愿意减片酬啦，同埋依家积极会搵多啲好剧本，拎返公司，睇下公司有无兴趣，绝对支持。」

周家怡：「知道呢个消息当然系好开心，好支持，好开心知道佢哋有呢个行动，咁希望快啲多啲人可以开工啦！同埋希望可以拍多啲唔同题材嘅戏，除咗商业片之外亦都会拍一些艺术性质的戏，透过电影故事带出信息畀观众。」

李靖筠：「当然好开心可以同唔同嘅公司合作，希望擦出新嘅火花。至于想拍啲咩戏？我仲系一个好Green嘅演员，所以我唔想咁快去规限自己，咩种类嘅戏都好想做。」

杨天宇：「因自已性格较外向，阳光青春及搏击类的，较刺激的题材都会是希望拍到的题材，其实天下一亦有同自已年龄相近的演员，希望藉此机会可以交流交流。我觉得今次英皇同天下一的合作对香港业界有一定帮助，不论系台前或幕后。同时亦可以满足到观众嘅欲望，因为无论系咩时候我相信观众睇电影嘅欲望都唔会减低。」

陈家乐：「咁当然系好事啦，两间公司联手创作十套港产片去帮返香港市场，咁系非常之好嘅，系呢个时势好多台前幕后工作人员，都的确系有好大嘅影响，咁我都有幕后嘅朋友，呢段时间都变咗要转行，要做其他唔同嘅工种，其实人才流失系真系会㗎，依家有呢十套电影，希望可以帮返多啲人去做香港电影，去保持产量同质素。我希望嚟紧可以拍多啲喜剧，因为喜剧可以令人开心啲，依家香港都需要一啲好开心嘅能量，希望可以透过电影畀到开心嘅气氛香港人。」

姜皓文：「绝对支持，义不容辞！需要到我帮忙，乜都冇所谓唔使讲嘢！电影圈就系咁团结！」