【头条独家】新歌恶搞史前偶像 ERROR想同BTS Crossover

2020-05-07 23:00

由ViuTV《全民造星》衍生的组合ERROR推出了新歌《我们很帅》，为切合「骑呢cam爆男子组合」定位，宣传照中四子恶搞史前偶像，戴上假发化身2001年《流星雨》时期的F4，相当爆笑：「我哋要杀埋嗰班大少女，希望每个年代嘅女士都会锺意我哋，唔系只得年青人。」采访：方骞平化妆：Kinny Lee 发型：Terrence Chan @HAiR 造型：Felix Wong

ERROR成员193(郭嘉骏)、保锜(吴保锜)、肥仔（梁业）及阿Dee（何启华）分别扮成周渝民(仔仔)、朱孝天、言承旭、吴建豪，阿Dee带笑说：「当日我哋搵影宣传相资料时，本身睇紧韩国BIGBANG，点知有F4啲相走咗出嚟，后来凭感觉设计咗呢张相，原来F4真系好衬我哋呀！仔仔系废㗎嘛，好贴切193罗，朱孝天识音乐似保锜，言承旭有男人风范，几咁Man几咁有气势，每次望到大佬肥仔背影就谂起道明寺，而我眼细最似吴建豪。」

成班都黐线
听毕阿Dee介绍，193即反驳他：「喂！你唔好咁攻击我喎！仔仔Fans，唔该喺IG留言闹爆佢！」阿Dee即戴返个头盔补充：「我系评论初出道时对仔仔嘅感觉，当时佢除咗外貎，乜才能都冇！不过，经过多年嚟娱乐圈浸淫，佢哋𠵱家全部好有才华，我哋反而好似初出道嘅佢哋。」保锜突然弹咗句：「我同佢哋方向一样，出道系为咗想赚钱，佢哋𠵱家发到傻咗，我哋好想似佢哋咁样，希望连台湾人都留意我哋，下一步我哋会同Michael Jackson、BTS、G-DRAGON等Crossover。」193反问：「同Michael Jackson系咪阴间同阳间Crossover？」保锜就话系Crossover啲demo啫，佢有好多歌都未出。

被指骑呢的四子对帅有唔同睇法，193觉得姜涛平日怕怕丑丑，一上台好有自信，好charm；保锜觉得陈伟霆有自傲感觉，好适合做一个表演者，而他冇钱所以未帅：「喺呢个社会，有钱先有自信，好似肥仔系好靓仔，因为佢真系好有钱，可以救济到身边嘅人，我系其中一个。」