【头条独家】Stay Home太耐 苏玉华潘灿良出街郁吓

近日香港的新冠肺炎疫情录得多日零确诊，专家都叫香港市民唔可以掉以轻心，依然要戴口罩加勤洗手。因为感觉无咁危险，条街都多咗好多人。近月发起撑舞台剧同行计划「PROJECT ROUNDABOUT」的苏玉华及潘灿良都忍唔住出咗铜锣湾行街，两人乜都睇，衫又睇，波鞋又睇，香水又睇连表都睇埋，睇嚟真系闷咗好耐。采访:梁志明

首先要赞吓苏玉华同潘灿良，自己嗰行自己救，眼见舞台剧界受新冠肺炎严重打击，有表演者被逼转行，两人举行4场的《不日上演》读剧会，令舞台剧界从业者继续有工开，亦会一改昔日行规，在筹备时便会向台前幕后员工即时发放酬金。据知读剧会得到热烈回响，有人愿意免费提供现场录影服务，亦有人愿意出钱资助等，好人一生平安。

系咁行系咁睇
当日下昼4点，戴咗帽及口罩，穿便服嘅苏玉华同潘灿良拖住手去咗铜锣湾皇室堡行街，两人先去睇香水同化妆品，睇咗一阵冇入手，然后行去百德新街睇鞋，咩类型嘅鞋都啱，然后再去睇衫，运动衫啦，卫衣啦，风褛啦同Cap帽，都系得个睇字。然后去咗睇家品，行咗半个钟终于有收获，之后再去睇智能手表，见苏玉华试咗好多款，男友都不断有畀意见，但都系冇买，最后两人行过一间海鲜餐厅，门口睇阵餐牌，潘灿良有啲兴趣，苏玉华冇兴趣，所以就同餐厅讲拜拜。