【爱靓唔爱命】新戏30个造型破纪录　 卫诗雅首著和服贪靓宁捱饿

由卫诗雅（Michelle）主演的爱情小品《熟女爱漫游》将于4月2日上映，全片在日本东京取景，为了突显由卫诗雅饰演的「陶莎莎」天真率直的性格，电影美指出身的导演蔡洁铃和服装组，特别为她度身订造了超过30个造型，Michelle表示：「开拍之前试造型，导演话可能要试两日，我心谂有咩可能要试咁耐？点知上到去以为自己去咗Boutique，因为佢哋差唔多准备咗成50套衫，而且好多都系走可爱路线，好Cute好少女又Colourful嘅服饰俾我，每试一套衫都觉得自己后生晒，变返22岁嘅年纪，其中有几个造型我好锺意，剧组拍完戏仲特登送俾我留念！」

Michelle仲话：「其实电影中好多造型我都未试过，因为太过可爱唔系我嘅Style，但谂深一层，到咗呢个年纪应该都无咩机会系现实生活中着呢啲衫，所以好珍惜拍戏时可以着得咁青春。不过拍戏初期我都因为太多造型搞到好混乱，成日都唔知自己拍到边场戏，要花啲时间谂返剧情同情绪。加上我哋套戏要转好多场景，仲要大部分都系一啲平时旅行去唔到嘅地方，所以好多时都要系街换衫，甚至试过一日要换3、4个造型，但亦都因为咁，俾我练成极速换衫又唔会整花个妆嘅技术。同埋因为啲景同造型好靓，导演同监制特别砌咗本写真集送俾我，真系一份既窝心又有独一无二嘅礼物！」

电影有一场戏讲述「陶莎莎」相约了日本朋友参加庙会，为了配合剧情，Michelle与男主角唐禹哲都要穿上传统和服，Michelle表示：「我第一次着和服，所以唔知道原来系咁讲究，剧组特别邀请咗一个和服师傅嚟现场协助我哋着衫，我见唐禹哲好快就着完，咁我就谂住拍完先食饭，等上镜可以靓啲嘛，点知我着咗成个钟先搞掂，套和服连埋头饰有成7、8磅重，仲要系超紧身，系想大力啲呼吸都好难，所以我最后要等拍完成场戏先可以再食嘢，不过第一次着和服嘅体验好有趣同新奇，大家见到我一身和服造型都赞我Kawaii，所以为咗靓捱一阵肚饿都系值得嘅！」