【头条独家】老婆助演超级贱男 谭俊彦唔会抽离唔到角色

谭俊彦(Shaun)喺TVB新剧《十八年后的终极告白》中好有发挥，由正直变成阴森，经常讲大话、呃女人感情，仲会出卖朋友。Shaun强调作为一个专业演员，唔会抽离唔到角色变贱男：「去一次旅行，连同负面情绪乜都唔记得晒啦，离开香港系放电嘅最好方法。」采访：方骞平

《十八年后》系两年前存货，对谭俊彦来说，播出时间啱啱好：「因为有《法证先锋IV》对比，喺TVB终于觉得自己真系似返个演员，每套剧都有啲唔同嘢畀观众睇。『林朗生』同我本身性格好唔同，所以好难演，好彩有太太同我搵出阴险一面，佢陪我拍剧，坐喺镜头前畀中肯意见我，有场监狱戏，我要同年轻版自己做戏，笑到喊，喊到笑，感觉好恐怖。」

餐厅蚀百万
谭俊彦庆幸一年前同TVB签咗新约，收入算稳定少少，喺疫情下仲顶得住：「我绝对唔系为兴趣拍剧，我系要养小朋友，好多人误会星二代唔使做，但爸爸狄龙冇做生意，要使钱，佢啲积蓄只够佢过下半生，我40岁喇，应该我搵钱畀屋企人，唔会问家人拎钱。不过，𠵱家饮食生意难做。」Shaun又提到在土瓜湾经营的西餐厅试过一周有两、三日冇客人，「餐应主打出售西班牙火腿，之前西班牙受疫情影响，乜货都攞唔到，运费又倍增，所以呢几个月，我同股东每人至少蚀100万，月尾结数时真系心都滴血，大家都惊，但又唔敢话畀老婆听，始终仲有两个小朋友读书。有个拍档冇出粮两个月，每个月大厨要分段出粮，攞到20万抗疫基金只系帮到少少。」