【头条独家】「限聚令」前 中环闹巿扮猪四围爬 何广沛开心被路人当傻仔

新冠肺炎疫情严峻，政府3月29日实施「限聚令」，禁止多于4人在公众地方聚集，不过被指电视台及电影等在街上取景拍摄存在灰色地带。而早前已完成拍摄的TVB科幻喜剧《食脑丧B》，在未实施「限聚令」前，拍摄一场讲述中了丧尸病毒的何广沛要靠食脑为生，因食了猪脑而变成猪一样在中环闹巿四围爬，由于要配合镜头，广沛在马路上来回爬了几次，不过在疫下他相当小心，爬前黐晒胶纸保护，爬后亦即时用消毒湿纸巾狂抹，虽然被不少路过巿民送上奇异眼光，但他反而劲开心话：「真系当我傻，个剧情真系要畀侧边啲路人感觉有个怪人喺度爬嚟爬去，我觉得系成功咗㗎！」采访：杜淑霞、谭壹致

由于该场戏讲何广沛因丧尸病毒发作，要在街上横冲直撞乱跑，最后仲会变成猪一样四围爬，剧组选择在清晨约7时便开始在中环中心区进行拍摄。首先拍摄广沛乱跑戏份，接住广沛仲要扮撞到一名路人飞起，由于当时行人不算太多，要由着晒OL打扮的临时演员饰演行人，未埋位前一众临时演员都戴晒口罩做足防疫措施。


之后再拍广沛食了猪脑而变成猪一样四围乱爬，在疫情下广沛亦相当小心，试位后工作人员即帮他手掌黐晒牛皮胶纸保护，膝头亦有戴上护膝，但在石屎地爬一样唔容易，加上要迁就镜头及人流，虽然有临时演员帮手，一样要在马路来回多次拍摄，引起不少路过巿民投以奇异目光。其间，广沛更一度要戴上腰封，上面加上自拍棍及主观镜头拍摄，全程靠自己控制，由于他第一次这样拍，所以有一度难度，要拍了多次来调节先可以顺利完成。最后他更要爬到车间拍摄，虽然全部是道具车相当安全，但他完全冇怨言相当瞓身。拍摄完，广沛除了企在路边唞大气外，仲即刻用消毒湿纸巾狂抹，相当注重卫生。

闹巿爬唔觉尴尬
事后广沛都承认拍这场戏算辛苦，「今日主力喺中环闹巿扮猪爬啦，系辛苦嘅，但剧组好好拣咗早嘅时间拍，避免人多。」广沛又解释这场是剧集内第一次上身戏份，「讲我食咗个猪脑上身，有呢个经历，呢个系我哋头几集嘅一个笑位，希望观众睇得开心。」问到爬来爬去辛唔辛苦？他就话：「虽然话加咗护膝又贴晒胶布，其实都痛嘅，但为咗效果都爬咗好多次，又set咗主观镜，近远都拍咗好多次，希望可以做到编剧想表达嘅笑位出嚟啦！」


至于在闹巿爬，广沛完全唔觉得尴尬，反而多得巿民当他傻仔睇，「我就觉得唔尴尬嘅，反而系我拍紧，真系有啲路人见到觉得呢条友咁奇怪喺度爬嘅，变相佢哋做埋临时演员嘅角色，反而效果仲好，有时拍戏啲人会锺意企定定睇戏㗎嘛！佢哋当我傻嘅奇怪眼光，入埋镜帮到个角色，自然反应仲好，帮到成个画面，中环好难话控制人流，好多路人经过，听番啲摄影师讲，侧边啲人啲反应仲好睇呀！真系当我傻，个剧情真系要畀侧边啲路人感觉有个怪人喺度爬嚟爬去，我觉得系成功咗嘅。」讲到亲自控制自拍棍拍摄，他都承认有难度，「我都系第一次用，呢个系佢哋（摄影师）自己设计，我系第一次试唔知个效果拍出嚟系点，摄影师叫我多啲左右fing，其实系有啲难度，喺闹巿跑呢系好容易撞到人，有啲可能唔系临时演员系真正嘅路人，我有支好长自拍棍喺前面好惊拮到人，我又要顾住跑同做戏，好惊整到人，系有啲难度，但左右fing成个迷茫嘅感觉，同埋畀嘢上身个感觉出到嚟罗，虽然嗰幕有啲担惊受怕，但出嚟效果好好。」