星島日報

【頭條獨家】「限聚令」前 中環鬧巿扮豬四圍爬 何廣沛開心被路人當傻仔

2020-04-17 22:15
廣沛爬在馬路上來回多次拍攝,除了臨時演員外,還引起不少路過巿民投以奇異目光。
廣沛爬在馬路上來回多次拍攝,除了臨時演員外,還引起不少路過巿民投以奇異目光。

新冠肺炎疫情嚴峻,政府3月29日實施「限聚令」,禁止多於4人在公眾地方聚集,不過被指電視台及電影等在街上取景拍攝存在灰色地帶。而早前已完成拍攝的TVB科幻喜劇《食腦喪B》,在未實施「限聚令」前,拍攝一場講述中了喪屍病毒的何廣沛要靠食腦為生,因食了豬腦而變成豬一樣在中環鬧巿四圍爬,由於要配合鏡頭,廣沛在馬路上來回爬了幾次,不過在疫下他相當小心,爬前黐晒膠紙保護,爬後亦即時用消毒濕紙巾狂抹,雖然被不少路過巿民送上奇異眼光,但他反而勁開心話:「真係當我傻,個劇情真係要畀側邊啲路人感覺有個怪人喺度爬嚟爬去,我覺得係成功咗㗎!」採訪:杜淑霞、譚壹致

廣沛爬在馬路上來回多次拍攝,除了臨時演員外,還引起不少路過巿民投以奇異目光。
廣沛爬在馬路上來回多次拍攝,除了臨時演員外,還引起不少路過巿民投以奇異目光。
話晒要扮豬,廣沛除了爬,表情都做到十足。
話晒要扮豬,廣沛除了爬,表情都做到十足。



由於該場戲講何廣沛因喪屍病毒發作,要在街上橫衝直撞亂跑,最後仲會變成豬一樣四圍爬,劇組選擇在清晨約7時便開始在中環中心區進行拍攝。首先拍攝廣沛亂跑戲份,接住廣沛仲要扮撞到一名路人飛起,由於當時行人不算太多,要由着晒OL打扮的臨時演員飾演行人,未埋位前一眾臨時演員都戴晒口罩做足防疫措施。


之後再拍廣沛食了豬腦而變成豬一樣四圍亂爬,在疫情下廣沛亦相當小心,試位後工作人員即幫他手掌黐晒牛皮膠紙保護,膝頭亦有戴上護膝,但在石屎地爬一樣唔容易,加上要遷就鏡頭及人流,雖然有臨時演員幫手,一樣要在馬路來回多次拍攝,引起不少路過巿民投以奇異目光。其間,廣沛更一度要戴上腰封,上面加上自拍棍及主觀鏡頭拍攝,全程靠自己控制,由於他第一次這樣拍,所以有一度難度,要拍了多次來調節先可以順利完成。最後他更要爬到車間拍攝,雖然全部是道具車相當安全,但他完全冇怨言相當瞓身。拍攝完,廣沛除了企在路邊唞大氣外,仲即刻用消毒濕紙巾狂抹,相當注重衛生。

在車間爬真係幾辛苦㗎,但廣沛一句怨言都冇,夠晒專業。
在車間爬真係幾辛苦㗎,但廣沛一句怨言都冇,夠晒專業。
廣沛要靠自己控制主觀鏡拍攝,有一定難度。
廣沛要靠自己控制主觀鏡拍攝,有一定難度。



鬧巿爬唔覺尷尬
事後廣沛都承認拍這場戲算辛苦,「今日主力喺中環鬧巿扮豬爬啦,係辛苦嘅,但劇組好好揀咗早嘅時間拍,避免人多。」廣沛又解釋這場是劇集內第一次上身戲份,「講我食咗個豬腦上身,有呢個經歷,呢個係我哋頭幾集嘅一個笑位,希望觀眾睇得開心。」問到爬來爬去辛唔辛苦?他就話:「雖然話加咗護膝又貼晒膠布,其實都痛嘅,但為咗效果都爬咗好多次,又set咗主觀鏡,近遠都拍咗好多次,希望可以做到編劇想表達嘅笑位出嚟啦!」


至於在鬧巿爬,廣沛完全唔覺得尷尬,反而多得巿民當他傻仔睇,「我就覺得唔尷尬嘅,反而係我拍緊,真係有啲路人見到覺得呢條友咁奇怪喺度爬嘅,變相佢哋做埋臨時演員嘅角色,反而效果仲好,有時拍戲啲人會鍾意企定定睇戲㗎嘛!佢哋當我傻嘅奇怪眼光,入埋鏡幫到個角色,自然反應仲好,幫到成個畫面,中環好難話控制人流,好多路人經過,聽番啲攝影師講,側邊啲人啲反應仲好睇呀!真係當我傻,個劇情真係要畀側邊啲路人感覺有個怪人喺度爬嚟爬去,我覺得係成功咗嘅。」講到親自控制自拍棍拍攝,他都承認有難度,「我都係第一次用,呢個係佢哋(攝影師)自己設計,我係第一次試唔知個效果拍出嚟係點,攝影師叫我多啲左右fing,其實係有啲難度,喺鬧巿跑呢係好容易撞到人,有啲可能唔係臨時演員係真正嘅路人,我有支好長自拍棍喺前面好驚拮到人,我又要顧住跑同做戲,好驚整到人,係有啲難度,但左右fing成個迷茫嘅感覺,同埋畀嘢上身個感覺出到嚟囉,雖然嗰幕有啲擔驚受怕,但出嚟效果好好。」

戴自拍棍跑住拍攝,廣沛最驚整傷其他人,所以份外小心。
戴自拍棍跑住拍攝,廣沛最驚整傷其他人,所以份外小心。
廣沛扮撞到行人其實唔易拍,好在同臨時演員配合得好。
廣沛扮撞到行人其實唔易拍,好在同臨時演員配合得好。
爬前廣沛黐晒牛皮膠紙好好保護雙手。
爬前廣沛黐晒牛皮膠紙好好保護雙手。
爬後廣沛即用消毒濕紙巾狂抹雙手。
爬後廣沛即用消毒濕紙巾狂抹雙手。
廣沛由馬路爬到上行人路都有一段路程,都咪話唔辛苦呀!
廣沛由馬路爬到上行人路都有一段路程,都咪話唔辛苦呀!
前前後後爬足兩粒鐘,拍完廣沛都要企定定唞番啖大氣放鬆吓。
前前後後爬足兩粒鐘,拍完廣沛都要企定定唞番啖大氣放鬆吓。

最新回應

關鍵字

相關新聞

熱門文章