【头条独家】着埋Full gear 《丧Ｂ》扮封大厦吓亲街坊 江嘉敏爆上吐下泻力证冇中招

新冠肺炎肆虐全球，近期多国出现封城情况，早前香港亦出现过封大厦，𠵱家港人睇到有人着住Full gear保护衣，都咪话唔惊惊。日前由吴冠宇监制的科幻喜剧《食脑丧B》，去到大坑拍摄一场丧尸病毒蔓延到社区，政府决定封大厦保巿民安全戏份，现场全部演员包括主角何广沛、江嘉敏、朱智贤、林凯恩、车婉婉和炜烈等，都戴晒口罩演出，仲有不少人着埋Full gear保护衣，搞到经过街坊都吓一吓。而自爆刚病完复工的嘉敏，就澄清自己绝对冇中招，她除了呕吐和肚泻冇其他病徵，仲话因食完嘢即疯狂喷射式呕吐，所以好肯定是食物中毒。采访：杜淑霞、谭壹致

当日11时许，何广沛和江嘉敏等演员、工作人员及临时演员一行人，在大坑华伦街进行拍摄，由于场戏讲大厦被封后获解封，好多家庭亲友团聚，所以全部演员都可以戴住口罩演出，仲有不少演员扮医护着埋Full gear保护衣，唔睇清楚啲都几可乱真㗎！所以好多街坊经过，或者巴士上面乘客，见到都吓一吓，以为真系封大厦，后尾了解清楚当然离唔开影相留念啦！

剧中何广沛和江嘉敏在被封大厦内，解封后终于可以离开，演广沛家姐和细妹的朱智贤（Ashley）和林凯恩劲开心来迎接，本来导演要求两人跑埋去揽住广沛，点知两人太开心竟然一左一右夹晒上广沛身，搞到广沛差啲招架唔住，要紥行马先顶得顺，但三人愈玩愈开心，仲设计埋揽住再转多个圈先至落地。至于嘉敏亦有演父母的炜烈和车婉婉来接，一家三口仲难得除口罩影全家福。不过，平日好似开笼雀的嘉敏，当日似乎有神冇气，成个静晒。

嘉敏恨钳广沛
对于拍封大厦戏，广沛都觉得相当应景，「贴近𠵱家情况，同埋我哋又拍得安心啲，全部人都戴晒口罩，你见到大家都开心好多，欢乐啲，玩都玩得尽啲啦！」但嘉敏似乎相当羡慕Ashley和凯恩，「你哋就开心啦！钳咗上去，我拍咁耐都未钳过佢呀！（林：我唔信罗！）」广沛反驳，「咩呀！你直接公主抱喎！（朱：我哋钳冇你锡锡喎！）何：你哋一个系阿妹一个系家姐，No！No！唔可以㗎！」赞广沛好艳福，他笑言：「都要咁上下承担得（朱：口窒喎！）起头家㗎！？（江：好腰好肾好男人）」叫嘉敏讲多次，她即更正，「好腰好男人。（何：头先话好肾㗎！）你好唔好肾我鬼知咩！（何：你咁赞下唔觉嘅。）见你一嘢钳咗两个女仔上去，条腰几好，仲可以转多个圈，仲唔系好腰好男人。」

嘉敏即自爆刚病完复工，「第一因为佢哋（朱和林）两个喺度唔够斗，佢哋温馨啲，亲情系赢唔到；第二，前日食错嘢食物中毒，一个钟里面呕咗12次，黄胆水都呕埋出嚟（林：叻呀！有料！）其实昤噚日都休息咗一日嘅，呢日冇再呕，但仲有肚痛，啲力气都唔系好够。（何：专业！）（林：前辈！）」三人仲鼓埋掌支持，但当问到嘉敏怕唔怕自己中招患了新冠肺炎，广沛即9秒9闪开，Ashley又话：「走先！」不过嘉敏就话完全唔担心，「我冇发烧咳嗽同其他病徵，又冇外游，呕吐系其中一个病徵，唔系最主要嘅病徵，同埋我系一食完一个钟内疯狂喷射式呕吐，所以一定唔系濑嘢，一定系食物中毒。」点知广沛仲要寸佢话：「你可唔可以唔好偷食咁多呀！食得太杂！（江：嗰啲汉堡包薯条喺晒呢度（指住额头）。）你已经系咁咩，仲爆晒暗疮。（江：咩呀！）」