【头条独家】 无惧疫情 拍《食脑丧B》连咀12次 何广沛江嘉敏𡁻香口胶当消毒

继《大酱园》后，何广沛和江嘉敏最近在科幻喜剧《食脑丧B》再合作，今次两人演一对，仲会有大量咀嘴戏。两人近日密密开工，日前终于在中环9号码头上演首场咀戏，由于当晚好大风又冻，为营造浪漫效果，结果两人要连咀了12次先拍完。不过在疫情下，两人依然相当专业，收到好剧本都好想拍好场戏，事前冇乜特别准备，只是𡁻吓香口胶当消毒，何广沛仲话：「冇理由喷消毒酒精喺个口度嘛！」讲到今套剧有唔少咀戏，江嘉敏就搞笑话畀咗唔少钱编审，先至有机会丧咀何广沛喎！采访：杜淑霞、李维隆

剧中何广沛和江嘉敏分别演丧尸和黑道千金，何广沛本来劲冧陈晓华演的网红KOL，后来先同江嘉敏由欢喜冤家愈行愈近。呢晚剧情讲江嘉敏借酒消愁同何广沛狂呻，点知何广沛突然情不自禁咀咗佢，仲要咀完又好惊咁调头就走咗去，搞到江嘉敏都畀佢吓窒。

口气味劲怪照咀
晚上7点几，广沛和嘉敏在码头落车，行去拍摄位置的9号码头，沿途经过不少街头表演档和少量游客，但两人为免整花个妆，全程冇戴口罩，幸好其他工作人员和临时演员都有戴口罩，做足防疫措施。埋位两人即刻同导演排戏，明知拍咀戏，两人都好识做𡁻定香口胶，由于场戏讲江嘉敏饮醉啤酒，她仲要求工作人员畀真啤酒佢饮，香口胶加埋啤酒味，应该口气相当独特。到正式理位，广沛完全冇投诉嘉敏口气味劲怪照咀落去，认真唔话得。当晚气温只有10几度，加上好大风，要迁就好多嘢下，两人足足咀咗12次先完成拍摄，拍完啱啱摩天轮都熄灯。其间，未有戏份的陈晓华亦早到探班，仲话专登向师兄师姐偷师学演咀戏。

望恶梦快啲完
讲番感受，广沛话：「今日天气冻，大家都辛苦，你睇佢啲头发都吹到乱晒，原本系件好浪漫嘅事，大家变咗好冻啦！」嘉敏话：「都OK嘅，因为我哋一唔使埋位工作人员就攞好多衫畀我哋，同畀好多暖包黐落身上面，其实都好温暖。」两人仲话原来这次是重游旧地，嘉敏说：「4年前我哋喺后面嗰个位锡，系呀！第一次畀咗佢都喺呢度。（广沛：4年前《亲亲我好妈》喺呢度定情，我系你初恋呀？我好荣幸罗！可惜你唔系我初恋。）冇嘢啦！bye！」问到疫情下有冇做足措施先咀？广沛话：「都系食番香口胶，冇理由喷消毒酒精喺个口度嘛，我惊我乸亲呀！（嘉敏：我专登唔拣薄荷味香口胶㗎！知你唔锺意薄荷味，几细心呀！拣咗士多啤梨味甜啲嘛！等你有个美好回忆，等你唔好同人讲江嘉敏个口臭㗎！）其实我发咗恶梦4年㗎啦！我希望个恶梦可以快啲完。（嘉敏：我头先本身食Dinner想拣咸鱼鸡粒炒饭㗎，就系惊臭亲佢。）我本来都想嗌，点解我哋唔嗌埋一样咁就唔会觉得有问题。（嘉敏：唉！蚀咗呀！下次啦仲有机会。）你畀咗几多钱编审呀？（嘉敏：我啱啱点解NG咁多次，死啦，荷包乾啦！）」