【头条独家】唔怕老公诈型姜丽文赞王梓轩好大只

2020-04-17 20:33

近日全球受新冠肺炎疫情影响，不少人响应呼吁尽量留在家中，网上因而出现不少「Challenge」。身在洛杉矶嘅王梓轩(Jonathan)隔空挑战比他大一岁，现年34岁嘅「索人妻」姜丽文(Lesley)，跟她齐齐运动抗疫，梓轩话：「我同Lesley都系玩开运动，于是我挑战佢，大家各拣5个动作，亦希望观众一齐做。」两人做到出晒汗，上气唔接下气，做足一小时，一啲都唔hea，着住运动裤及运动Bra 的Lesley仲做到擘晒脾，弯晒身，玩得相当投入。其间Lesley仲唔怕老公仔Pakho呷醋，多番大赞梓轩身形好hot好大只！

鬼妹仔嘅Lesley，中文向来唔多好，运动其间发生唔少笑料，喺做完上半身热身后，Lesley随意说：「你做下体热身啦！」梓轩滴住汗反问：「下体？」Lesley大笑话：「讲错咗，哈哈！我系想讲下半身，其实每一个人拉筋嘅system都好唔同。」两人不时提醒观众留意呼吸同饮水，唔可以坐低，梓轩话：「Don't sit down!一坐低个人就会放软，好难恢复……」过了半小时后，梓轩突然收到IG通知需要收费，梓轩好「豪」咁话：「8蚊我畀！」Lesley拍晒手话：「为咗我哋大众健康！」

除咗做运动外，两人更分享近况，梓轩话：「我乖乖留喺屋企做吓运动，同埋度紧新项目，疫情爆发前我系要出去上堂，𠵱家出唔到街改咗online学。」梓轩续指，当地除咗必需品嘅店铺开门，其馀店铺一律停水停电。而Lesley最近除咗拍TVB新剧《踩过界2》外还会去买餸煮饭仔留家抗疫：「呢排都系同老公喺屋企打机，唔见朋友呀！之前有一段时间好down，之后开始睇书，要继续学多啲嘢……」两人更推荐多本书籍，Lesley更介绍一本parenting嘅书，为将来教育小朋友作好准备。