【头条独家】深水埗派口罩畀长者 范振锋李思欣派到喊
2020-03-30 21:14 
范振锋喺疫情下工作量大减，就算冇工开，两公婆都唔畀自己停落嚟，仲出钱出力落区派口罩，好有善心！虽然只系出点绵力，但公公婆婆非常开心，搞到两公婆感动到眼湿湿！采访：方骞平
之前范振锋、李思欣联同公司艺人黄进林、郑仲恒低调去咗深水埗李郑屋村派口罩畀长者：「佢哋最缺乏，亦系最需要呢啲物资，冇口罩就足不出户。今次我哋同明爱郑承峰长者社区中心合作，派口罩畀100户长者，10个一包。为免长者要排队辛苦，我哋先去中心入口罩，然后按资料入落信箱，由社工联络佢哋开信箱拎。」
仍有工开算好彩
洗完楼，众人沿途再派畀一啲清洁工同执纸皮婆婆，「其中一个年纪较大嘅女工友话，公司每日只配给一个口罩，所以千多谢万多谢我哋，仲祝福我哋健康，见老人家反应咁大，我同思欣感动到即时标眼泪，其实我哋只系好小嘅心意同力量，大家只系夹咗少少钱，换来人哋讲足多次感谢，系意想唔到嘅事。」因此，阿范承诺会继续做善举，因为中心方面都想大家知道深水埗基层的苦况，需要多啲人关怀。
范振锋在疫情下还有电台及娱乐公司工作，每周三日有工开，都好过食白果。至于思欣就好好彩，因为签落两个广告，收咗订金，稍后补拍。问到可会趁空档来「造人」？阿范即耍手拧头：「咁嘅时势唔好住，搞掂自己先，等个世界好啲再算。」至于之前有份投资的饮食生意几乎全部已退股，不受影响。
最新回应