【头条独家】《冲游》开拍第六辑　胡慧冲穿梭泰国捐窿捐罅搵料

武汉肺炎疫情持续扩散，全球多个国家都有确诊病例，由于泰国系内地人嘅热门旅游点，所以当地成为中国以外，疫情最严重国家之一。居泰港人「泰国通」胡慧冲（Roger）向本报记者报平安：「曼谷暂时生活如常，学照上，工照返，商场照开，啲人照出街食饭。」Roger庆幸他未有受疫情影响工作量，更预告即将开拍第六辑嘅旅游节目《冲游泰国》：「好嘢唔好畀佢停，就算喺疫情下，为咗观众眼福都在所不计！」采访：方骞平

由胡慧冲主持嘅《冲游泰国》一直成为TVB J2台最强收视节目，所以播足四年，至今拍了97集成为皇牌节目。第六辑暂定今年六月出街，Roger开始着手筹备：「目前曼谷市面上一切如常，大型活动未见取消，工作照去，街道上唔太多人戴口罩，唯一喺捷运入面多咗人戴。口罩、消毒药物、酒精搓手液都出现抢购潮，不过，呢度好快补到货。我都有走遍大街小巷，适可而止咁帮屋企人同好朋友扫货，为咗佢哋，哈！我竟然一个口罩都冇预留畀自己，唯有戴住公仔布口罩顶住先啦，(周围去搵料唔怕中招？)其实当地人比较乐观。」

事业未达标唔会死
Roger突然有感而发：「喺自己事业未达标前，应该都死唔去嘅，因为心愿未了嘛！」他又大搞烂gag，话自己目标好似歌手咁，总希望登上红馆，感受最大嘅舞台：「不过，呢啲好讲机缘嘅，正如我喺《冲游泰国》插曲《快乐泰度》填嘅歌词都有劝勉自己：『得不到不必喊，皆因你未到终。』总之一日未死，一日仲有机会。」