【头条独家】三母女出巡零交流　曹央云自讨没趣撩街拍

94年亚姐季军曹央云与富商何永安离婚后，一直独力凑大两个宝贝女，眨下眼二人都踏入青春期，自然唔多听妈咪话，所以近年都经常见到曹央云自己一个外出。直至日前，三母女终于难得「合体」落铜锣湾行街，惜囡囡各自沉醉于手机世界里面，结果曹央云出招撩二人街拍，最终得到大女「假笑」一个，超无瘾！采访：梁志明

武汉肺炎肆虐，曹央云大女Audrey于农历新年间，因中甲型流感留院9天，搞到要冒险频扑医院，她都直言：「真系明知山有虎偏向虎山行，只有妈妈先会咁做。」确实，曹央云真系好锡囡囡，就算被两位千金Audrey和Promise无视，她都甘愿承受。话说日前傍晚6点，曹央云挽住个过万蚊的Hermès，带埋两个女儿到利园二期Shopping，三母女难得一齐出街，她本身都笑晒口好开心，无奈正值反叛期的囡囡却唔多骚妈咪，先是年约16岁的大女Audrey企到九丈远，一边行一边低头揿手机，10岁幼女Promise则塞住双耳听歌，大家全程企到离行离罅，零交流。

大女假笑应酬妈咪
最终曹央云谂到计撩阿女，她一个转身停低帮二人影靓相，岂料Promise即刻快步弹开，完全唔畀面！本来Audrey都唔多理，继续向前行，但见妈咪三催四请、追住自己，结果她都好识做，企定定望住镜头勉强一笑；满足咗妈妈铺影相瘾后，囡囡又秒速打回原形，继续木口木面玩手机，Promise亦都跟番队形，夹喺中间跟住妈咪行，搞到曹央云歪晒嘴咁，好无瘾！

随后，三母女去Burberry睇衫，曹央云即刻捉住店员打牙骹，仲倾到笑晒口、搭晒膊头咁，镜头一转，两个宝贝女呢？原来又坐埋一二边做低头族，最后她买咗一条披肩就走人。至行到去老三阳，两个囡囡终于「回到」现实世界，同妈咪拣吓零食、买吓茶叶蛋，惜开心嘅时间过得好快，曹央云畀完钱又做返孤独精！