【头条独家】《多功能》首演自恋贱男监制陈宝华爆黄浩然唔敢拍

2019-12-20 00:30

编写个多套收视剧集的金牌编审陈宝华，相隔16年最近回归港剧，监制《多功能老婆》引起不少话题，更靠好剧本吸引到影后级的杨千嬅再拍剧集。宝华姐坦承今次回归因不忿港剧被踩唔好睇，决定拍套好戏。她爆搵千嬅和黄浩然演出时，千嬅单听故仔已眼红红；浩然最初就不敢做自恋贱男。她仲大爆洪永城为怕着泳裤现肥腩，一度向她大脾气要求她先着三点式。撰文：杜淑霞摄影：李权威

宝华姐坦承返内地发展后，确实少留意港剧，直到听到一句说话，令她肾上线素颷升，「我喺内地听到有人话依家港剧唔好睇，虽然我冇研究港剧好耐，但听到都好嬲，好唔锺意咁可以点，跟住肾上线高咗，所以决定今次返嚟为港剧出番一分力，为港剧服务。」

怕现肥腩发脾气
讲起搵千嬅出任女主角，宝华姐坦承最初冇谂住她会答应，「我只系同佢讲个角色系一个奉献型嘅女人，跟住同佢讲咗啲场口，我眼红佢又眼红，之后嘅条件系公司再同佢倾，之后公司话佢答应咗我都唔信，我谂佢都系想为港剧出一分力。」至于男主角黄浩然演绎的贱男「尚剑雄」，连他太太都公开话憎，原来最初浩然确实唔敢演，「我识咗浩然好耐，知道佢承担到啲咩，我同佢讲呢个角色时，佢谂咗两秒问我『我得咩宝华姐？』我话点会唔得，我唔会写得好核突，我啲戏冇牀戏嘅。佢又问过我『生到我咁样要锺意我有几难』呢句对白好寸，我话都未够自恋。」

提到拍摄时的搞笑事，宝华姐即大爆洪永城竟然向她发脾气，「嗰日拍场沙滩戏，几个男仔要着泳裤，我问洪永城点解仲唔换，佢发脾气话『你换比坚尼我咪换罗！』柏豪同（王）梓轩都呆咗，我望吓佢个肚腩，我话『你自卑呀？』佢再话『佢哋个个咁fit，尤其系柏豪！』咁佢抑郁到叫我换比坚尼，我都要照顾演员嘅情绪，咪改咗啲对白罗！」