【头条独家】朱晨丽投诉牀戏主动除衫洪永城澄清：我有着裤㗎！

2019-12-12 23:30

朱晨丽（朱朱）和洪永城（Tony）最近在剧集《多功能老婆》这一对相当出位，一时打打闹闹；一时又热情到晕。两人首演夫妻，都话有时拍亲热戏都觉尴尬，讲讲吓朱朱仲突然投诉Tony在一场牀戏中自动波除衫，搞到朱朱要搵张被包住自己，避免有肌肤之亲，而Tony就澄清自己有着裤，只是想似平日瞓觉，两人访问全程斗咀，戏内戏外一样咁有火花。撰文：杜淑霞摄影：李维隆发型：Steve Shek @HAiR(朱晨丽) 化妆：Herman Ng(朱晨丽) 服装：Magazzin Group(朱晨丽)、FiveCM(洪永城)

朱朱和Tony上次合作是在剧集《味想天开》，朱朱笑言今次Tony身份升咗呢，「上次佢做我阿哥，今次佢升咗呢做我老公啦！」Tony即寸嘴话：「咁下次你做我阿妈啦！」互窒不留情，就知他们有几熟络。谈到剧中两人有不少亲热戏，他们都话有时都会好尴尬，朱朱更投诉Tony牀戏唔着衫，「嗰日我哋有场牀戏，佢突然唔着衫呀！」Tony就急忙解释，「咩呀！我只系冇着衫啫！我有着裤㗎！」朱朱再呻：「我即刻用张被包住自己，费事掂到佢呀！」Tony再解释：「咁平日瞓觉我都系唔着上半身，只系想生活化啲啫！」

叫何广沛努力
讲到剧中朱朱演的「思蕾」恃靓行凶食住老公「伟立」，朱朱就话平日唔会咁样攞着数，「我连喺街巿攞棵葱都冇试过喎！」Tony都力撑朱朱唔会咁做，「佢应该唔会咁嘅，佢都好少要人就佢嘅。」朱朱笑言：「其实我系男人嚟，唔兴做呢啲嘢㗎！」问到Tony将来结婚会唔会似个角色一样是个老婆奴，他就坚称一定唔会，朱朱都认同话：「Tony好坚持同有主见，应该唔会畀老婆要胁到。」他们都话拍完这套剧，学到点样做人老婆老公，不过Tony就话仲未有计划做人夫，「我同女朋友（梁诺妍）系朝呢个方向行，但真系未有计划。」而朱朱就坚称未有对象，仲笑言叫绯闻男友何广沛要努力啲。讲到边个够资格做多功能老婆，Tony就大赞除了千嬅，陈炜都是男人梦想的多功能老婆。朱朱就话自己未够资格，「我煮饭真系唔叻，但会努力学习。」