【头条独家】买圣诞礼物冧三条「仔」　岑洁仪13万名表赠老公

岑洁仪（Zoey）于12年下嫁马来西亚富商Dixon Chin，婚后叠埋心水做幸福少奶奶，得闲约朋友High-tea行名店，又间中坐吓私人飞机周围去，生活优哉游哉。至诞下大仔Damian和细仔Donnie，Zoey就变成「全能妈咪」照顾家中三条「仔」，而Dixon都好识做，早年已送车送楼慰妻！查实Zoey都好有情趣，日前趁老公出埠公干，便凑埋刚放学的Damian去拣圣诞礼物，其间更睇中一只13万元的男装Rolex，唔使问一定系送畀老公啦！采访：李权威

自升呢两子之母后，岑洁仪除照顾一对宝贝仔外，间中亦会做马评、KOL赚吓私己钱，见老公Dixon工作辛苦，又经常买嘢𠱁自己，圣诞将至，当然也要为对方准备一份「重手」礼物啦！日前傍晚5点半，手挽粉红色Chanel Tote Bag的Zoey，拖住大仔Damian到将军澳PopCorn买礼物，头戴画家帽的她穿上黑色短裤衬长Boot，露出一双纤幼大髀，性感得来又青春，十足未生过一样！未知是否打算给老公惊喜呢？当日，两母子先到Rolex专门店睇腕表，甫坐定定，男店员即拎出一本Catalogue向她介绍今季表款，未几，Zoey便睇中于橱窗展示紧的新款男装表，价值港币133,600大元！

陪囝囝拣礼物放电
Zoey将6位数的名表戴上手，左睇睇右试试，又叫埋囝囝帮吓眼，不过唔知系咪闷亲Damian，冇耐已经开始坐唔定，家下乜都「阿仔大晒」的Zoey见状，即放低手表留待下次研究，并带囝囝到附近Logon拣玩具，沿途经过商场的圣诞装置，Damian仲开心到飞埋去叫妈咪揸机影相。

一入到精品店，童心未泯的Zoey一见到女仔嘢即指住叫囝囝睇，Damian梗系冇兴趣，扯住妈咪去睇车车同超级英雄嘢啦，见到个型仔Marvel玩具，他即刻Show畀妈咪睇，殊不知Zoey挂住研究手上的Toy Story公仔！好在Zoey都察觉到囝囝扁扁嘴，最终买了一件Star War玩具给对方，见她畀钱时又拣多件大大份的礼物，估计也是送给细仔作圣诞礼物！临返屋企前，这位「廿四孝妈咪」又带Damian去游戏中心放电，其间，两母子玩气垫球玩到劲High，囝囝仲紧张到爬上张枱，双脚吊吊揈，超搞笑！