【头条独家】不容小三 演《多功能》学识依赖老公 千嬅讲明丁生若出轨誓弃夫出走
2019-12-17 22:09 
杨千嬅相隔18年最近再拍港剧，在《多功能老婆》演绎积极面对失婚的「蓝飞」，她坦承今次肯拍只因锺意监制陈宝华编写剧本够晒贴地。《多功能》中，令观众睇到咬牙切齿一幕肯定系「蓝飞」被「小三」硬抢老公黄浩然，千嬅坦承角色同自己反差好大，自己一定冇「蓝飞」咁包容，若然丁生出轨，冲动的她必然会算数放弃呢段婚姻，「我会一笔炒起晒然后走，重新嚟过，最多我同个仔解释。」她又话演完「蓝飞」令学识点样做人老婆，太独立对老公未必是好事，「原来适当地依赖，反而令老公觉得系开心嘅事。」撰文：杜淑霞 摄影：梁志明 形象：Anson Lau 发型：Vic Kwan关列峰@ii Alchemy Hair&Nail 化妆：LingChan @Ling Chan Make Up 服装：@tibi@harveynicholshk
千嬅锺意今次《多功能》故事够写实，睇完剧本就决定要挑战，「点解今次我咁有兴趣，系我觉得宝华姐今次个剧本系好时下好贴近嘅嘢，尤其是婚姻失败之后企番起身，有啲人选择好负面咁生活，或者好唔开心，但系宝华姐呢个故仔系比较正面好积极，呢个积极唔系好说教嗰种，失婚大不了咪从头嚟过，不特止仲唔会话等番个老公返嚟，可以去move on一段新感情，电视尺度好少拍呢啲，仲要嗰个系姐弟恋嚟㗎喎。」
同「蓝飞」反差大
今次角色「蓝飞」令千嬅好想挑战，正因跟她个性反差比较大，特别是处理感情问题，「我嘅包容力量冇『蓝飞』咁强，我好明白要坚守一个家庭，系要唔同经历，系需要包容，去成就一件事每个人都会犯过失，会畀大家反省空间，但嗰个信仰都冇『蓝飞』咁深入。我可能系一个职业女性，事业型嘅人，某啲价值，尤其我系艺人，思维逻辑真系好自我，我未必有呢份耐性，因为感性嘅人就好冲动，我系更加感性嘅人，『蓝飞』其实系好理性嘅人，所以感性同理性嘅差别就系，我会算啦一笔炒起晒然之后我走，重新嚟过，最多我同个仔解释，我对待件事冇咁理性罗！」
为尊严宁行乞
演完「蓝飞」后，千嬅自爆似上了一课，学识夫妻相处之道，「我发觉拍完套剧自己个人都有成长嘅，成长唔系喺演出技巧上，系做人逻辑思维上面，其实呢个世界有唔同嘅人，亦都真系有女人可以为咗个家庭牺牲好多嘢，我拍完之后都有思考，两夫妻嘅嘢，我自己有时太过感性太过冲动，我演完『蓝飞』之后，同丁生相处上，觉得有时我都要喺佢立场上，畀佢feel多啲我嘅感受，可能我同『蓝飞』啱啱相反，因为我比较独立，冇咁畀老公觉得被需要，冇咁依赖，原来适当地依赖，反而令老公觉得系开心嘅事，有时又唔可以多，多就麻烦㗎啦。」
虽然外界觉得「蓝飞」跑住追车追返老公一幕感人，但讲到最难忘一幕千嬅反而觉得要帮老公黄浩然向老板张国强求情一场，「呢个系尊严问题，但成就老公尊严比自己尊严更重要，作为一个女人我觉得好伟大，自己睇剧本时个心都好唔舒服，但真系好难演，但演完自己都好开心满足，因为现实中我系宁愿行乞（因为你性格都倔强）系呀！但系拍完又学到嘢，性格倔强硬颈系态度，但有时为咗成就一件事妥协，都系一条出路。」
最新回应