阿碌开咪｜阿仔醉酒老窦被省

今日香港，有几个行业真系日日打晒锣搵人，包括医生、护士、护理员、社工、教师、建筑、司机、保安、清洁……

还有一个行业，因小弟日日出街食饭，故特别清楚其惨况，正是饮食业。无论厨房、楼面及清洁，全部大量缺人，尤以做中下层客的食肆更甚。

街坊茶记出唔起钱？唔系！而系个个打工仔（尤其年轻的）都希望打大集团、潮店、高级餐馆及酒店工，因制服乾净企理，客人质素亦较高。

于是中下级食肆，只能请到整体质素较平庸的一群，兼且流失率相当之高。

我每日帮衬的茶记，老板娘正正尝尽这种苦头。此店本来请咗位阿姐朝朝七点拉闸开门，顶住楼面，而厨房就由太子仔掌管。大约八点半，老板及老板娘出现，由厨房到楼面到清洁一脚踢孭晒，捱到晚上十点收工。老友，你谂下几鬼辛苦！老板辛苦，只能咬咬牙，应该嘅。不过，员工绝不会咁谂。东家唔打，大把西家。故此，半年内已换咗三个七点开铺的阿姐。一唔捞，就由老板娘顶埋。睇住佢捱到只屐咁，不时埋怨：「钱又唔系畀得少，就晒佢哋，全职又得，兼职又得，都唔满意！」

佢应明白，间野咁鬼地踎格，点留人吖（你唔好问我为乜锺情呢种茶记）？

昨日，大件事。小弟七点如常夹住大叠报章进入店内，在坐惯的地方摊开，准备「柯打」之际，老板娘鬼食泥咁声气：「阿哥，今朝得我一个，由厨房撑到楼面，咪催呀！」

由佢吚吚哦哦声中，得知原来上工不久的阿姐又唔玩。本来坐镇厨房个太子爷则前一晚劈酒冧咗，断片，起唔到身。老板（佢老公）则仍在瞓，要一小时后才赶到救驾。

死得，睇住七点半开始客人涌至，冇个知老板娘烦到癫，故呼喊落单之声此起彼落。老板娘忙到出烟，仍忍忍忍。终于八点见老公步入，立即情绪崩溃，眼带泪光，省到佢飞起。

此情此景，我了解，佢老公都了解，故大家默默无言。

曾智华

阿碌开咪