阿碌开咪｜赢硬赛事认真跑

特首选举史上首次「一匹马大赛」，明天开闸。跑真马，一匹跑也未必「赢硬」，因有机会喷鼻血停步，又或踩氹断脚（全部发生过！）。但「超哥大赛」，边有得唔赢？

虽然一只马跑，但超哥完全当「真」咁操，有齐顾问团、主席团、竞选办，公关策略也有专人负责。

所以，大家由佢开始宣布参选到第二、三日，已见明显变化，尤其笑容，因超哥先前形象绝对严肃，唧都唔笑，做大Sir咁款，当然可以吓窒三山五岳古惑仔，但选特首乃政客行为，一定要讨好全港市民，所以，一亮相就要笑！唔识？关埋门由专人教！

此外，心态上一定要是「面对全港市民」，千祈咪穿崩变「搞掂班选委就掂」。故此，挂在口边，一定要大团结，为全港市民服务，尤其关顾弱势社群，探访劏房户乃指定动作。其实智囊应该教佢跟埋明哥去深水埗探露宿者及派饭，咁就更是理想，画面一在电视及报章出现，立即加分！

幸而公关高手都有提点佢做肥彭最拿手一招，巡草根地点，包括街市。肥彭乃资深政客，惯技系见到乜街坊饮品食物都「队」入口，包括凉茶及蛋挞。呢方面，超哥略逊，只表示喜欢食牛杂。其实佢应该向着镜头「队」几粒鸡蛋仔、钵仔糕及灌杯鸡骨草就更理想。

搞选举、搞亲民，就是要做平民日日做的事，以示We are same same。

所以，林郑选举工程认真失败，竟连八达通都唔识用，连买厕纸都唔识买。

我哋冇得选特首，但日日见超哥左扑右扑，「真嘅一样」咁去操，OK啦吓嘛，又唔系佢想一个人跑嘅，无谓怪佢嘞。

今次超哥最特别为个个商会都亲身拜访，连渔民团体联会都去，独冇去地产建设商会，大家唔使问点解，心照！

今日沙田跑十场，周三冚旗之潘顿，将配合告东尼齐齐开饭！骑三只告厩马「乐满贯」、「合夥雄心」、「加州威胜」，必有皇者兴！又或连珠爆发！

曾智华

 

阿碌开咪