阿碌开咪｜动态抄牌神出鬼没

又中又中又中！中乜？中正「牛肉乾」是也！

相信全城车主及司机皆有我的经验——哗哗哗，抢钱咩，使唔使抄得咁狼吓喂？

我最新一张中，乃是在红磡高山剧场旁静静的山西街，时间早上八点四十分。

小弟习惯，每朝七点至八点半茶记叹早餐，八点半到公园晨运。昔日到何文田巴富街球场，因疫情唔开（认真荒谬，大大个球场通风又清爽，监粗关闭，搞到本来的晨运客阿叔阿伯阿公阿婆冇得运动，一系被逼宅在家，一系行出马路吸尘，都唔知政府有乜逻辑及需要咁做？），改去高山公园。

过去四个月，早早把车泊在隐蔽的山西街路旁，行半小时，九点走人，从未有事。

终于前朝中！冇乜好怨，「犯法就是犯法」，抵抄。不过，呢个抵抄又引起我的好奇，其实抄牌的警员，上司系几时叫佢哋「做野」的呢？

有此一问，因不时早上八点半左右，警车又或有行咇警员经过，对违泊视而不见喎。

咁系咪一般九点先「开工」呢？唔知，只觉佢哋抄牌政策非常「动态」，难以触摸。

昨朝到土瓜湾街市买蛋，九点，车放蛋铺旁边，速速跳下买（全街冇表位），因刚食完「牛肉乾」，未消化，当然非常警觉啦。一边畀钱，一边左望右望，以便一见蓝色或啡色制服人士闪出（真㗎，佢哋不少如今真系一闪而出，手机一拍即出告票，完全唔使落笔），即刻跳返上车走人，三百二十元好贵啫。

蛋铺老板娘见我咁惊青，笑笑口：「哥仔，唔使担心喎，呢处朝朝抄，不过唔系九点。呢呢，九点半啦，冲锋车就会hur hur声到，成队人马一二三全条街抄抄抄。未够钟，放心！」

今次真系信佢一成，双目失明！因我未畀完钱，已见红蓝灯在街尾闪呀闪，即系点？即系今日阿Sir提早开工，等你以为我惯性九点半到？我就玩一朝神出鬼没你叹！

冇法，又疫情津贴又消费券，政府边度搵钱？合理嘅，我畀我畀！

曾智华

阿碌开咪