阿碌开咪|肯定度身订造

2021-12-03 10:55

某某高官传来公务员学院院长招聘广告,当然系想小弟多多宣传,难道叫我去考咩!

任何政府高层职位,所谓公开招聘,你知我知,当然有晒目标人物,然后在条件上度身订造,扮下都要,公开走走过场。结果——只得佢啱咋!

事实,咁重要位置,仲要系第一次出现呢个位,百分百唔衰得,点可以畀个三九唔识七者做?故此一定要中央信任,而特区政府高层,也要绝对掌握此人的能力、作风及价值观(当然包括政治)倾向,所以一定系熟人,兼且一定从公务员系统中找寻。

其实小弟以前已多次公开讲:「喂,次次嘥几百万元去『招聘』广播处处长,绝对浪费纳税人金钱!尤其有次简直核核突突,将广播处处长大学学历要求取消,摆明锯低三寸就某君,太离谱了。冇大学学历,去管几百个有大学学历又具丰富广播、管理及制作经验者,边会有人服㗎,摆明攞嚟搞!」

结果在反对声拆天响之下,政府才在唔觉唔觉之下修正返,从此再冇咁荒谬的招聘条件出现。

今次呢个公务员学院院长位,一睇要求,哈哈哈,小弟立即心里有数是为谁「订造」啦。目标人物,我一定认识(嗱嗱嗱,冇话系朋友呀),佢亦肯定称职(因已早早长期「在职训练」矣)。

边个?首先,唔会系做开D8、D10人工降格去做,咁已经筛走好多现任及退休高官嘞。

兼且要具本地、国家及国际事务,并全面准确掌握「宪法」、《基本法》及《香港国安法》。

单单呢三味,已再将人选收窄到得返三几个啦,边有机会爆半冷(勿讲大冷了)呀?

一般AO,根本谂都唔使谂,就算做开律政署的,一去到卓越领导及管理才能,敏锐触觉,喂,若里面有,都升咗超过D6啦。

所以,个「局」根本有晒硬性框框,边个傻下傻下走去报名,食硬柠檬!

我睇,百分百由就快退休的纪律部队高层过档啦,应该同系D6级,人选呼之欲出!

曾智华

 

阿碌开咪

關鍵字

最新回应

關鍵字
You are currently at: std.stheadline.com
Skip This Ads
close ad
close ad