阿碌开咪｜一唱做嘢 · 一静收工

上周五《头条日报》A1独家报道，九龙城三条旺街数十个公共泊车表位，长期被「泊车党」霸占，并以两小时六十元向车主出租，非法滥用公共设施牟利。

呢类行为，根本并非牟利咁简单，而是变相「恐吓」及「勒索」！因为班「泊车党」系明刀明枪收钱，若果唔畀，就赶你走。若果你够胆移开佢张胶凳或雪糕筒照泊车，咁班友的眼神甚至出晒口：「老友，小心你架靓车啊，畀人整花就无谓啦，喷一喷油都一万几千蚊喎！」

以上现象，日日出入九龙城（行人或驾驶者）一族无人不知，故此，执法者更肯定百分百了然于胸！事实小弟亲眼见过N次巡警及交通督导员经过，完全唔「做嘢」，掂行掂过，当乜都睇唔到。

究竟点解会长期可以咁，怕且就算有记者死????发问，九龙城区指挥官都只能咿咿哦哦，顾左右而言他，因肯定有某些「事实」不能公开讲！

好嘞，几时会「突然」改善或肯「做嘢」呢？全港政府部门十之八九皆如是——畀人摆咗上枱，曝光，瘀晒。

正如上周《头条日报》图文并茂，唱九龙城警区对非法泊车，甚至违法霸位「诈盲诈聋」。

咁……唉，咪做下嘢罗。立时派多几架警车在福佬村道、狮子石道、侯王道、城南道、衙前塱道、南角道、龙岗道兜来兜去，表示「我做紧嘢」！有冇效？当然有！故此，上周六开始至周一，止得下咳，啲霸位胶凳及雪糕筒暂且失踪。

不过，永远如是，当报章头版力锄食环署唔睇后巷，搞到蛇虫鼠蚁横生、垃圾乌蝇蚊螆满布，咁食环咪派人洗两日太平地罗，跟住……

政府部就是如此——一唱做嘢，一静收工！传媒唔唱，咁就大家当冇事发生。

九龙城各街道的非法乱泊乱占也如是。我前日刻意再揸车落去四围兜兜，明显执法力度开始「退潮」，因交咗几日货，再冇报章日日追住。咁咁咁，系咪「大家都要温食」心态又开始弥漫呢？

曾智华

阿碌开咪