【阿碌开咪】食到三高通波仔

不认不认还须认，谷针就是谷针。光明正大一齐谷，唔使遮遮掩掩！

　早前信和集团及华人置业率先公布，捐出千万港元新楼抽奖帮谷针。我一睇，哗，各大地产商今次肯定要飞身跟上，以免执输行头。你知啦，政治正确野唔肯做，后果可能会……心照啦，冇人讲明嘅。你在需要时帮政府一尺，日后随时会有人帮返你一丈，正是礼尚往来，大家识做。

　　果然，各大集团排队涌出。包括华懋集团、香港总商会、国泰航空、莎莎集团……肯定陆续有来兼斗「大」！

　　讲，就个个百万千万元咁送，其实荷包兜肚，送一千万元出去，限定得奖者帮衬返我，七除八扣，可能只捐三两百万元已掂。呢个，电视台做「巨奖」节目，赞助商大大声公布送出商品几多千元、几多万元，实质佢成本随时两折搞掂，即可换来雷霆宣传。

　　睇睇谷针奖品，都几搞笑，尤其全年自助餐任食！喂，老友，我成日强调李天命名句——多见生厌，意即你一定要与你喜爱的人、事、物，保持适当距离，制造期待感、馨香感，否则必出现反效果，由喜爱变厌恶。举例，你狂喜欢叹拖罗，但若要你早午晚三餐，日日食，月月食，好快你一听见拖罗两字或谂起拖罗阵味已想呕，一旦产生厌恶感，呢世可能都唔敢再接近了。

　　一年任食自助餐？怕且中奖者起初会贪心大食特食，到一星期后，可能已顶唔顺。两星期后，一定开始惊！未识惊？咁继续狂食啦，好快糖尿病及三高将一齐杀到。再食落去，预备几十万元通波仔可也！

　　谷针大抽奖策略，又的确有效。我前星期到何文田体育馆打第二针复必泰，下午四点，非常宁静少人。哈，公布有楼抽、有自助餐、飞行哩数、Staycation……等着数后，上周五在同一时间到同一中心，已见几乎坐爆！点到你唔服？

　　谷针送大礼，肯定再创高峰。希望快点谷到五百万针，开始有群体免疫，齐齐除口罩啦！

曾智华

阿碌开咪