霆鋒分享拍戲辛酸事：危險動作戲係菲林時代逼出嚟

在謝霆鋒的節目《鋒味前奏》第10集中，霆鋒、劉翁及火火3人繼續食住墨西哥脆片吹水，霆鋒又分享自己拍電影嘅辛酸事。佢講到以往仲係用緊菲林拍攝嘅年代，拍電影嘅壓力好大，「陳木勝導演同我講，菲林每一格值$2.5，所以好多變態危險動作戲，即係撞巴士、會展碌落嚟呀，都係菲林時代逼出嚟。」

佢話，雖然有時都會唔想做呢啲高危動作，「拍動作片起碼都要150格，你明明見到40級樓梯，導演叫你衝落去，雖然我全身都戴住pad（防護墊）啫，但其實係唔想咁做㗎嘛，但永遠就係嗌roll機，有我時都會唔客氣咁話：『導演，唔好意思，等等。』但一咁樣cut又唔知要嘥幾廿蚊。跟住武指又開始嚟啦，『好，霆鋒得唔得？』」攝製隊伍又嗌「Sound speed, Cam roll」，但如果都未準備好嘅話，就會被大鬧，「你跳唔跳啊？啲菲林好貴㗎！」所以佢唯有焗住做。

另外，火火又問霆鋒，有無諗過去拍一部屬於自己嘅電影，霆鋒直言有諗過，「但唔可以急，唔同嘅階段有諗過唔同故仔。」