後樓梯「激戰」牛雜妹 趙永洪勁驚:寧願上番床！

話題原創劇《向西聞記》前晚舉行首播禮後，昨晚其中三個單元包括《咖喱雞》的張建聲和陳意嵐、《PTGF&PTBF》的陳安立和張沛樂、《食女性地嘉亨灣》的趙永洪和李美琪 ( 牛雜妹 ) ，更夥同導演吳兆麟開 facebook live暢談拍攝點滴。

戲中趙永洪向牛雜妹爆粗求「扑」，最後拉她去後樓梯激戰，他稱其角色反映了現今年代的「飲食文化」，但拍該場激戰戲毫不好受，「拍嗰時又熱又侷，但演員有呢個好處，正常你唔會做嘅嘢，演戲就有機會俾你感受吓，其實都幾鬼驚，寧願上番床好過。」現今唔少男人靠吹呃女仔，趙永洪則稱此風不可長：「真的假不了，假的真不了，大話始終係大話，有一日會穿，呃人唔好做呀。依家網絡資訊太犯濫，要自己分清楚邊啲係真同假，如果唔係都好大鑊。」

向來乖巧的牛雜妹在《食》劇中扮豪放女，可謂耳目一新，她說：「過往我參演嘅角色同自己俾人嘅感覺接近，好開心今次導演咁大膽搵我做一個豪放女，希望我嘅表現冇令佢失望。呢個角色嘅性格設定同表達意識上都好大膽，令人睇到㷫烚烚，後樓梯嗰場戲，我拍嘅時候好緊張，因為戲入面我要主動錫趙永洪，手部游走佢身體不同部位，好怕唔小心掂到佢，俾佢以為我想非禮佢，哈哈。但經過導演親身指導示範，加上對手嘅配合，場戲總算有驚無險順利完成。」她稱讚趙永洪很細心，對她相當照顧。

提到一夜情的速食文化，問牛雜妹能否接受？她就說：「我唔特別贊成或者反對呢件事嘅發生，愛情上我係幾典型嘅水瓶座，非常憑感覺，如果感覺到而大家都係單身，why not ?」