【安心出軌】疑似聲帶流出 陳煒否認爆心穎同王浩信有景轟

黃心穎在車廂猴擒人夫許志安片段曝光後，事件震驚整個娛樂圈。隨後網上流傳一段被指是陳煒的語音訊息，內容謂：「嗰時我同萬綺雯返大陸做嘢，拍緊唔記得咩名…呀《東坡家事》，佢（心穎）同王浩信拖手啦，成日黐埋佢度，肯定有景轟啦！跟住有次去宣傳，佢同萬綺雯講，啱啱先去蘭桂芳飲完酒嚟，嗰陣時開始我都知佢肯定係啲Wet妹玩玩下嗰啲嚟，佢同馬明我都覺得唔慌耐，肯定係貪馬明傻吓傻吓咁啦！」
陳煒就事件以語音回應謂：「都知呢件事，咁你認識我都知我把聲我嘅語氣各樣都係咁㗎啦，所以我諗我都唔需要解釋，成件事係假嘅，條聲係假嘅。」
王浩信則以語音回應，稱：「咁我諗嗰位同事係誤會咗，因為我同心穎喺個套戲入面飾演夫妻，佢見我繑住佢隻手時，應該係我哋拍緊嘢或者係排緊嘢時候，喺戲外我哋絕冇咁嘅情況發生。」