倫永亮自言曾有42吋胸 陳潔靈：係咪肚腩咋？

倫永亮和陳潔靈為《健康快車音樂送光明慈善演唱會2019》獻唱，倫永亮受訪期間，透露體重由133磅增至139磅，現每周游泳兩次希望減掉6磅。笑問達標會否像惠英紅一樣騷fit爆泳照？他笑道：「好容易啫，比兩年時間我....都未必得，哈哈。不過我暫時唔會理會胸肌，因要先治療腰背的骨刺，現每周要睇脊骨醫生和物理治療，加上慢步行做動運，已漸漸好轉。其實我10幾年前都有過42吋胸，但唔好玩，所以反撲歸真。」此時，陳潔靈然浴袍look殺入，還笑指謝霆鋒自言衣服7個星期沒有洗，而身上的浴袍已7年沒洗過，嚇得倫永亮說：「我未試過跟著浴袍的女人影相呀！」繼而二人未開唱先開戰，笑爆全場！

當陳潔靈得知倫永亮自言曾有42吋胸肌，即取笑對方說：「係咪42吋肚腩呀？那段時間我應該同佢絕交咗！」倫永亮指個胸幾大唔重要，最重要是身體健康，陳潔靈反問：「你同我講嗎？語言欺凌呀！我哋真係成日拗交，佢唔比我鬧比邊個鬧喎，因為佢在台上都經常鬧我。」

聽到倫永亮指很懷緬二人合唱、很開心很有火花時，又問他：「點解要懷緬我？」倫永亮說：「睇佢頭腦幾發達呀！」陳潔靈又搞笑謂：「但身材簡單呢！我哋係咪好絕配？哈哈！佢仲話我哋可以一齊搞棟篤笑，但我企上台佢一定無得笑，只可以棟篤企；所以人哋做棟篤笑，我哋做楝篤叫喇！」倫永亮即哈哈笑道：「你叫我唔叫，我叫唔出！」陳潔靈接口說：「不過真係要做，都會有啲壓力，浴袍都出動咗，可能要反串扮男人做摔角手。」倫永亮趁機還擊：「完全不切實際，咪呃鬼人！」陳潔靈再發笑功道：「我哋上台前都係咁『鬆郁朦』，要先輕鬆、郁動、朦朧吓！」接不上口的倫永亮沒好氣說：「我廢事答佢，人到咗某個境界就會咁！」