謝安琪表演遇耳機失靈痛哭 張繼聰長文安慰：災難係堅，但你更堅

今日42歲生日的謝安琪（Kay）昨晚（12日）為音樂頒獎禮演出時，耳機突然失靈，徬徨無助的她唯有靠聽現場音樂追住入，令她大為緊張，回到後台時不禁爆喊，幸其後獲同台合唱的Supper Moment主音Sunny幫忙，最終都完成演出。花了心血準備卻在台上因耳機失靈而影響演出，對歌手來說是惡夢，所以Kay的老公張繼聰事後也在社交平台發帖，安慰老婆：「依20分鐘嘅痛苦，恐懼，㥬惶，心血白費...對表演者嚟講，係災難。災難係堅嘅，不過我認為你更堅」。

張繼聰帖文全文：
知道你為咗依個演出，花咗無數嘅心血去練習再練習，希望做到最好。
可惜Live performance 永遠有無限嘅意外會發生，而今次發生嘅意外，係歌手最恐懼嘅一種...耳機失靈
Sub stage 冇台mon，整個表演聽唔到自己把聲，聽唔到音樂聲...只係聽到耳機嘅沙沙聲，同觀眾席音響彈番嚟嘅聲（會展咁大，我估回音會唔止一浸），現場有幾千名觀眾，唔喺現場嘅更有數唔到咁多嘅觀眾....
依種情境，任何表演者發夢遇到都保証會嚇醒，不過，可惜，今次單嘢係堅嘅。依20分鐘嘅痛苦，恐懼，㥬惶，心血白費...對表演者嚟講，係災難。
災難係堅嘅，不過我認為你更堅
咁嘅環境，你仍然奮力完成整個演出，冇放棄任何一粒音任何一個小節
The Show Must Go On ，係一個表演者嘅專業。個騷你唔止go on，仲充滿勇氣咁完成。同埋，如果唔係經過咁充足嘅練習，一定冇可能做到，一定冇可能。大佬，聽唔到聲照唱，部琴冇聲照彈，聽唔到音樂數唔到拍子照入歌喎，真係靠心中有劍
長篇大論，唔係因為我哋嘅關係，而係大家都係表演者，所以好明白你經歷咗咩。意外冇人想嘅，不過你好叻。有啲叻係要係危困當中先會展現出嚟。同埋今次之後，可以更加膽生毛啦，上到台冇嘢驚㗎啦
經歷係用嚟強化自己嘅 。312，個宇宙預早送依份禮物俾你，等你再Level Up ,算係咁啦

最後最後

Happy Birthday My Lady 313 ❤