谢安琪表演遇耳机失灵痛哭 张继聪长文安慰：灾难系坚，但你更坚

今日42岁生日的谢安琪（Kay）昨晚（12日）为音乐颁奖礼演出时，耳机突然失灵，旁徨无助的她唯有靠听现场音乐追住入，令她大为紧张，回到后台时不禁爆喊，幸其后获同台合唱的Supper Moment主音Sunny帮忙，最终都完成演出。花了心血准备却在台上因耳机失灵而影响演出，对歌手来说是恶梦，所以Kay的老公张继聪事后也在社交平台发帖，安慰老婆：「依20分钟嘅痛苦，恐惧，㥬惶，心血白费...对表演者嚟讲，系灾难。灾难系坚嘅，不过我认为你更坚」。

张继聪帖文全文：
知道你为咗依个演出，花咗无数嘅心血去练习再练习，希望做到最好。
可惜Live performance 永远有无限嘅意外会发生，而今次发生嘅意外，系歌手最恐惧嘅一种...耳机失灵
Sub stage 冇台mon，整个表演听唔到自己把声，听唔到音乐声...只系听到耳机嘅沙沙声，同观众席音响弹番嚟嘅声（会展咁大，我估回音会唔止一浸），现场有几千名观众，唔喺现场嘅更有数唔到咁多嘅观众....
依种情境，任何表演者发梦遇到都保证会吓醒，不过，可惜，今次单嘢系坚嘅。依20分钟嘅痛苦，恐惧，㥬惶，心血白费...对表演者嚟讲，系灾难。
灾难系坚嘅，不过我认为你更坚
咁嘅环境，你仍然奋力完成整个演出，冇放弃任何一粒音任何一个小节
The Show Must Go On ，系一个表演者嘅专业。个骚你唔止go on，仲充满勇气咁完成。同埋，如果唔系经过咁充足嘅练习，一定冇可能做到，一定冇可能。大佬，听唔到声照唱，部琴冇声照弹，听唔到音乐数唔到拍子照入歌喎，真系靠心中有剑
长篇大论，唔系因为我哋嘅关系，而系大家都系表演者，所以好明白你经历咗咩。意外冇人想嘅，不过你好叻。有啲叻系要系危困当中先会展现出嚟。同埋今次之后，可以更加胆生毛啦，上到台冇嘢惊㗎啦
经历系用嚟强化自己嘅 。312，个宇宙预早送依份礼物俾你，等你再Level Up ,算系咁啦

最后最后

Happy Birthday My Lady 313 ❤