路人見紅公仔「急煞」跣低倒地 網民：應該好痛

懸崖勒馬？有網民拍攝到美孚一名男途人跑過馬路，懷疑見轉紅燈號於是「急煞」，結果因地滑而跣低，影片引發網民熱議，有網民雖然對慘痛遭遇深表同情，但形容「忍唔住笑咗」。

網民Macau Hou上載一段行車紀錄儀片段，昨日見到美孚美荔道行人過路處一名男子正奔跑過馬路，當踏出第二段馬路之際，估計見到綠公仔轉為紅公仔，立即停步，但因天雨路滑不慎滑倒，向後背脊落地。幸好當時車輛尚未起步，滑倒男子於是起身企定定。

大批網民轉發片段，雖然體會到「 一定好痛」、「隔住個mon我都覺得痛」，但不少人幽默地稱「佢一定心急得滯唔小心拉咗手制」、「 都話ABS好重要」、「我唔想笑㗎！但我睇咗超過10次！」。也有部分網民稱，起碼男子無衝紅燈禍及其他車輛，都應該讚賞。