為個唱狂操體能 千嬅或邀余文樂合唱

對於巡迴演唱會（廣州站）即將舉行，楊千嬅直言尚有30日好緊張，近排勤於練歌、排舞同做健身運動，又指上次演唱操得好瘦，今次個唱則不同，會主力跑步同帶氧運動，因為要有體能及體力抵抗天氣變化。提到今年是電影《春嬌與志明》十周年，可會考慮邀請余文樂做嘉賓合唱。她說：「呢套戲已經十年啦！有機會都會搵佢，佢好忙湊仔，佢都係鍾意小朋友。我未見過佢個仔，一定會拜會佢。」