維港會：聲稱流動支付無過數要碌卡 店鋪被質疑「有古惑」

相信唔少人都試過流動支付，例如Apple Pay、Android pay、轉數快等。有網民Facebook群組「PLAY HARD 玩硬」發po，指係一間香港數碼產品零售店，以Android pay買iPhone，恒生傳送手機訊息指過數成功，不過該店話部卡機無記錄，而且仲要求碌多次，店員話「放心, 如果check到過咗你兩次數，我地會安排退款！」，而樓主唔肯，話「傻的嗎？我信我個短信都唔信你啦！」。

樓主即時打去恒生度查證，而且開埋擴音俾店員聽，但個店員堅持佢哋銀行無數，繼續游説樓主再碌多次卡。而樓主唔肯，最後報警處理，經警員調解後，該公司答應警方用公司蓋章寫清楚：「如果佢地公司日後收到數會取消此張單和安排退款」，然後樓主說「疑似坐Office嘅人嚟咗，但態度惡劣，仲話可以出封信比我哋，但唔會有公司蓋章。」就此，樓主表示：「我真係火都嚟，即刻鏟到佢飛起！個頭話出封公司信証明，轉頭又話冇公司章。」

之後樓主話「用超高分貝再鏟佢，同佢講我大把時間同你玩，你繼續慢慢玩」，該店「最後先死死哋氣同我Say sorry，跟著解釋咁咁咁(真係人善人欺)。諗著佢今次會認真寫張有公司章嘅證明了事」，該公司轉頭又聲稱已向銀行申請緊急取消交易，樓主再打去恒生查證，銀行表示無可能即時取消到授權咗嘅數「如果對方銀行冇記錄又點可以取消到條數」，樓主指該店自圓其說功力係「神一般境界」。

唔少網民都認為「有古惑」，不過亦有網民指出，「香港老字號金行，大型個人用品公司都發生過呢個情況，以上兩間公司都有上市，唔通佢地又係呃人咩？」