维港会：声称流动支付无过数要碌卡 店铺被质疑「有古惑」

相信唔少人都试过流动支付，例如Apple Pay、Android pay、转数快等。有网民Facebook群组「PLAY HARD 玩硬」发po，指系一间香港数码产品零售店，以Android pay买iPhone，恒生传送手机讯息指过数成功，不过该店话部卡机无记录，而且仲要求碌多次，店员话「放心, 如果check到过咗你两次数，我地会安排退款！」，而楼主唔肯，话「傻的吗？我信我个短信都唔信你啦！」。

楼主即时打去恒生度查证，而且开埋扩音俾店员听，但个店员坚持佢哋银行无数，继续游説楼主再碌多次卡。而楼主唔肯，最后报警处理，经警员调解后，该公司答应警方用公司盖章写清楚：「如果佢地公司日后收到数会取消此张单和安排退款」，然后楼主说「疑似坐Office嘅人嚟咗，但态度恶劣，仲话可以出封信比我哋，但唔会有公司盖章。」就此，楼主表示：「我真系火都嚟，即刻铲到佢飞起！个头话出封公司信证明，转头又话冇公司章。」

之后楼主话「用超高分贝再铲佢，同佢讲我大把时间同你玩，你继续慢慢玩」，该店「最后先死死哋气同我Say sorry，跟著解释咁咁咁(真系人善人欺)。谂著佢今次会认真写张有公司章嘅证明了事」，该公司转头又声称已向银行申请紧急取消交易，楼主再打去恒生查证，银行表示无可能即时取消到授权咗嘅数「如果对方银行冇记录又点可以取消到条数」，楼主指该店自圆其说功力系「神一般境界」。

唔少网民都认为「有古惑」，不过亦有网民指出，「香港老字号金行，大型个人用品公司都发生过呢个情况，以上两间公司都有上市，唔通佢地又系呃人咩？」