農夫爭取聲演 《新喜劇之王》 面懵問星爺攞飯盒

周星馳賀歲新作《新喜劇之王》大年初一就上映，繼黃金組合「柳飄飄」張柏芝後，星爺邀請農夫為新戲角色聲演。眾所周知，農夫二人幽默搞笑，轉數又快，與星爺的第一次合作已經一拍即合，在配音工作中大放笑彈，2人見到星爺親筆簽名的摺櫈，嚷著話想要來珍藏，又拿著扮海報中的人物pose影相，更和星爺一同拿摺櫈合照留念！星爺不時與陸永C君兩人搭哂膊頭，工作過後更大讚兩人「平靚正」。

農夫二人今次分別為兩名戲中角色配音，C君形容自己的角色是一名已過氣的演員，而陸永就描述：「我是一名導演，戲中C君所配的角色就要拍我套電影，詳情就要入戲院睇喇。」以往多次與Do姐合作的農夫，今次他們要面對出名嚴厲的星爺，反而笑說：「講惡係無人類可以同Do姐媲美到，星爺都無鬧過我哋，其實他對我哋太仁慈善良喇。」他們更難得正經地分享從星爺身上學到什麼，C君：「星爺會循循善誘，佢會不斷問你意見，俾我哋自由發揮，所以會在佢嘅提問當中學到嘢。」陸永則讚歎：「星爺有時會為我哋示範點配，同一句都可以有好大分別，賺了好多經驗。」

不少人都認為農夫是因為其喜劇細胞被星爺看上，但他們搞笑自嘲：「其實係因為我地收得夠平，又無嘢撈，夠哂得閒。」雖然收得平，但農夫一見到星爺就問：「有冇飯盒食？」星爺回覆：「無！」陸永即說：「無飯盒唔緊要架！我唔食飯都得！」三人你一言我一語後，星爺補充：「佢地啲喜劇元素係不斷爆發，佢地應該係平靚正。」似乎對兩人的表現都相當滿意。農夫亦乘機向星爺偷師，要他贈二句如何成為「喜劇之王」，星爺瞬即發揮喜劇之王的本色，他回應：「好難架喎，用兩句就未必得，起碼要多啲時間。」