【有片】行動不便長者斑馬線示意等等 司機懶理照過被轟

斑馬線應行人優先使用，但有私家車司機途經大埔賽馬會診所對開斑馬線時，竟懶理一名行動不便、正在過路的長者，照向前行駛未有停低，在場一名司機的車Cam片段拍攝經過並放上網，掀起熱議。網民都怒斥私家車司機有恃無恐，呼籲樓主舉報事件。

有網民將車Cam片段上載至facebook群組「Tai Po 大埔」，片中所見，車Cam片主與旁邊行車線的白色私家車車主駛至斑馬線時亦有停低，但其後一名行動不便、要撐拐杖的長者橫過馬路期間，已遞手示意司機稍等，但私家車司機疑見前方車輛已行駛，故未有理會長者。樓主在帖文留言指，「大家覺唔覺得大埔賽馬會斑馬線好危險，太多司機不理行人」。

帖文引來不少網民留言，大多批評私家車司機無視交通法例，「有人喺條斑馬線就需停車，就算上邊有人玩嘢喺條斑馬線行嚟行去都係要停架啦，都唔知個牌點考返嚟，犯法當老馮」、「斑馬線係行人有權行先，太多人有車牌但唔識渣車同道路法例」、「個伯伯已經行動唔方便！ 讓下要死咩？」另有網民指曾在上址目擊多次同類情況，「對面有賽馬會診所，好多老人家出沒，見過好多次， 私家車目測老人家步速慢，所以唔停車直衝」。