【阿嬌註冊】新郎新娘甜蜜咀嘴 鍾欣潼出嫁眾星齊嗌不捨

鍾欣潼（阿嬌）跟老公賴弘國（Michael）約下午5時在尖沙咀進行簽紙註冊儀式，阿嬌換上粉紅色Deep V花裙，跟穿西裝的Michael在一眾出席親友見證下宣讀誓詞，然後交換婚戒，並情深一吻。期間好姊妹容祖兒大搞氣氛，大叫：「好嘢！錫多啖，錫唔夠喎！」
錫錫後就開始簽紙儀式，英皇集團主席楊受成及賴弘國父親擔任證婚人，簽紙後四人合照，霍汶希（Mani）提議老闆楊受成挨近阿嬌影相，老闆即笑說：「我驚Michael嬲呀。」及後一眾英皇藝人齊齊起哄同阿嬌講：「我唔捨得你嫁呀！」阿嬌還擊：「我好想你哋嫁呀！」祖兒再話：「嫁出去嘅水等如潑出去嘅女。」心水清嘅阿Sa就即刻篤爆，說：「係咪講錯嘢呀？好似係嫁出去嘅女等如潑出去嘅水喎。」全場爆笑。簽紙儀式完結後，一對新人就同親友影大合照。
隨後，眾人移師室內向長輩斟茶，二人首先跪地向老闆楊受成斟茶，並由祖兒客串「大妗姐」，飲過茶後，老闆就向賴弘國「訓話」：「你要好好對她（阿嬌），不好的話你就不要來香港。」