民建聯晚會三前高官大跳hip hop 張曉明題詞以220萬投得

民建聯今晚舉行兩年一次的籌款晚會，特首林鄭月娥、全國政協副主席梁振英、中聯辦副主任何靖、多名司局長出席撐場，相當熱鬧。民記主席李慧琼致辭時話，昨日係九西補選投票日，大家嘅選票順利將陳凱欣送入立法會，希望今晚各位善長人翁繼續投票，「唔係投下選票，而係鈔票」，引來全場大笑。

民記兩年前搞籌款晚會，時任中聯辦主任、現任港澳辦主任張曉明捐出一幅字畫，籌得天價1800多萬，今次張主任為「不忘初心牢記使命」郵票珍藏冊題詞，底價只係50萬，最終由榮華慈善基金創辦人楊榮華以220萬投得。已故國學大師饒宗頣墨寶「量寛福厚」，經過幾口叫價後，由全國政協常委許榮茂以1000萬元投得。

籌款晚會亦有唔少表演環節，李慧琼開金口獨唱一曲《中國夢》，籌得300多萬；三位前高官蘇錦樑、譚志源同高永文更化身韓國組合大跳hip hop ，連日為陳凱欣拉票的高永文雖然有啲甩beat，但勝在誠意撘夠，同戴上假髮跳舞的譚志源施展渾身解數，搏得全場掌聲。