鄧萃雯送蛋糕賀金馬男配 袁富華開心爆喊：咁鬼馬

袁富華（Ben）剛勇奪金馬獎最佳男配角獎，返港後立即為ViuTV新劇《婚內情》趕工，夥拍鄧萃雯、林德信（Alex）大鬥演技。攝影師更「加餸」慶祝Ben哥得獎，拍攝途中雯女突然送上蛋糕，祝賀Ben哥為港爭光，Ben哥忍不住喜極而泣，說：「咁鬼馬！唔怪之得未cut機就入嚟啦！搞到我喊晒又要補妝！」
袁富華笑指已收拾心情，為新工作做準備，說：「一返到香港就要排舞台劇，之後嚟呢度開工，工作都未停過，不過係開心嘅。雖然第一次同雯女合作，不過大家都有講有笑，已經唔記得當中的疲累。」他又謂未諗加片酬，隨緣圓滿「主角夢」，說：「緣份到自然有啦，其實之前都拍了部電影做主角，不過未上映，其實一切都係等緣份到，我好鍾意做戲，所以有冇咩獎都唔緊要，最緊要有戲畀我做。」
首度與鄧萃雯、林德信合作，袁富華大讚有火花，說：「第一次同雯女合作，因為大家好肯傾，我又係舞台劇出身，好著重排練搵火花，搵最好的演出方法。（拍完有冇得放假？）冇啊，因為我哋做舞台劇，拍完就要埋位閉關排戲，所以一直做落去。」