拍片反駁楊潤雄質疑「廣教中」 Ben Sir：若有危機更不應放棄

教育局局長楊潤雄昨於電台節目中提及，港人繼續以廣東話學中文，長遠而言會否失去優勢，引起爭議。中大中文系前高級講師歐陽偉豪(Ben Sir)指，如果廣東話有發展危機，就不應放棄，更要成為長遠發展用作學習中文的工具。

Ben Sir在facebook上載影片，質疑指即使楊潤雄提及的「全世界用普通話學中文」正確，亦也未必是最理想學習中文的方法，「我哋點解要跟住個世界走？乜唔係我哋要領導世界、要有創意，令廣東話學中文係最優質，等個世界跟住我哋走咩？如果乜都跟住世界走，咁高錕教授就發明唔到光纖喇喎」。

他認為，若預視到廣東話有危機，更應將廣東話成為能長遠發展學習中文的工具，「校長老師教書，見到學生發展唔到落去，你唔會放棄佢㗎嘛……如果廣東話真係危危哋，咁成個教育界就要拯救廣東話，一個地方嘅語言唔能夠發展落去，幾大件事呀！」

他續指，澳門主要語言都是用廣東話溝通，但澳門教育官員不會公開質疑自己的語言，「呢排成日講大灣區，嗰『9+2』城市全都係講廣東話，但從未見過有大灣區嘅官企出嚟質疑自己嘅語言廣東話，能唔能夠長遠發展落去」。