余德丞出院啦！感言生命無take 2：好快重新出發

余德丞（Dickson）上月初踢波不適昏迷入院，心臟一度停頓，留醫深切治療部（ICU）近5日後情況好轉，再轉送心臟科病房觀察。早前他已報過平安，希望盡快出院，今日他再於社交平台報喜：「我出院啦」，並感言生命無take 2，會好好珍惜活著的日子，及多謝醫生同護士們、屋企人、朋友和同事等的支持。剛於本月2日29歲生日的Dickson亦甫出蛋糕照，及好友為他集氣的心意卡、簽名T恤。

Dickson全文如下：

我出院啦
感謝瑪麗醫院嘅醫生同護士們，見住你哋早更完又夜更，又一大早巡房，又每日24小時留意住我嘅病情，真係辛苦你哋！
感謝我嘅屋企人，每日擔心我病情嘅變化，又驚我唔知有咩需要，仲要每日頻頻撲撲幫我準備三餐。
感謝我公司，我經理人同一班好同事，成日擔心我會鑽牛角尖亂咁唸（諗），一得閒就開解我。
感謝我嘅朋友，知我一個人悶，一有空檔就嚟陪我傾偈，仲要買埋生果糖水畀我食。
感謝每一位關心我嘅你哋同支持我嘅fans，喺唔同嘅社交平台都見到有好多問候我嘅訊息。雖然我未能夠一一回覆，不過我絕對感受到你哋嘅心意。

不過坦白講，原來連續咁多日面對住一樣嘅三面牆，加埋打唔開嘅窗，感覺真係好難受！所以我都希望今次之後，我嘅身體會生生性性，爭一口氣，唔好再令大家擔心。

醫生話短期之內唔可以做運動住，相信都會係我最唔習慣嘅。生命無take 2，今次咁好彩有多一次機會，我一定會好好珍惜。畀啲時間，等我休養多一陣，好快我就會重新出發 #我只想身體健康 #回家最好不過 #第二生命#comebackstronger #happybirthdaytome #hk #hkig #instadaily #yuts