拉埋慧敏哥拍MV開工笑到收工 林欣彤爆背後苦況

林欣彤（Mag）近日雖然備受聲帶問題困擾，但仍落力宣傳新歌《Da Di Da》，及為年尾12月的處女演唱會積極備戰。新歌由Mag親自作曲及填詞，靈感來自好友陳慧敏及另外兩名昔日「巨聲」戰友。為了紀念這段一起走過不少「高山低谷」的友誼，Mag早前誠邀慧敏哥一起到海邊為新歌拍MV，兩個大細路更寓工作於娛樂，除了大啖食美味手工雪糕，更齊齊在海邊曬太陽執貝殻，全程開工笑到收工。

Mag笑言鏡頭前與慧敏哥雖然開心到爆，但其實拍攝過程台前幕後不無辛苦，說：「嗰日其實好曬好熱，我哋為咗驚曬傷，導演一嗌Cut，我哋就衝去幫自己擔遮，忙到不得了；難為隊Crew仲要『乾煎』搵拍攝角度，真係好多謝佢哋。跟住我哋食雪糕嗰陣，根本一買完杯雪糕就係咁滴，但我哋又要喺鏡頭前扮開心喎，好狼狽。然後我哋瞓喺沙灘度最Relax嘅時候，無端端一個大浪冚埋嚟，完全避唔到，成個人濕晒。不過有慧敏哥陪我，就算發生咩事我都覺得好好笑。」Mag又大讚慧敏哥甚有義氣：「雖然拍呢個MV時好好笑，但拍完之後，已經好大風，天文台仲話有打風嘅可能性。所以慧敏哥一收工，就要滾水淥腳趕船返澳門，真係辛苦佢。上次佢幫我拍MV又係要捱夜同捱時差，呢位朋友真係唔話得 。」